Ты арняште «ВАЛЕНТИН КОЛУМБЫМ ЛУДЫНА» акций Марий кундемысе школлаште да тӱвыра тӧнежлаште эрта.
Валентин Колумб ила гын, тений 3 майыште 82 ийым тема ыле. Шочмо кечынже С.Г.Чавайн лӱмеш национальный библиотекыште «Валентин Колумбым лудына» акций эртаралте. Тушко Йошкар-Оласе 7-ше №-ан школын тунемшыже-влак ушненыт.
Ты школын педагог-организаторжо Закиева Ирина Вячеславовна тунемше-шамычлан Колумб нерген фотосӱрет ончерым видео йӧн дене ончыктен да поэтын илышысе оҥай фактше-влак дене палдарен. Тудын палемдымыж почеш, Валентин Колумб изиж годым марла мутланен огыл, вара гына тунемын.

Марий Эл Республикысе тӱвыра, печать да национальность паша шотышто министерствын национальный ден конфессий кыл шотышто пӧлкажым вуйлатыше Садовин Игорь Геннадьевич йоча-влаклан книган да марий йылмын кӱлешлыкше нерген ойлен. А ты министерствын вӱдышӧ специалистше Иванова Елена Александровна икшыве-влакым чолга лияш ӱжын да Колумбын ик почеламутшым лудын пуэн. А «Кугарня» газетын корреспондентше Терентьева Эльвира Аркадьевна Колумб нерген шинчымашыштым терген да «Кугарня» газетын коллективын Колумбын «Эре чоҥешташ, чоҥешташ!» девизше почеш пашам шуктымыжым каласен.
Йоча-влак марий мутмастарнан поэзийжын ятыр шӧрынан почеламутшо-влакым йӱкын лудын пуэныт да ойыртемалтше муторлаҥгыж нерген палемденыт. Книгагудына поян, ойленыт библиотекарь-влак, кажне ийын тудо 300-400 книгалан пойдаралтеш. Тыгак книгагудышто тыршыше пашаеҥ-влак марий писатель-влакын пашаштым кузе аралыме шотышто ойленыт.

Фотовойзыш: Иванова Елена Александовнан.