2 августышто Марий Эл Провой кундем Какшамарийын «Родо-тукым вож» лӱман пайремже лийын. Какшамарий яллан 467 ий темын. Тиде кечынак Волжский район Кӱшыл Азъялыште ял пайрем эртен – кумдан палыме кум чолга еҥлан шарнымаш оҥам почыныт.

Мер Каҥаш лӱм дене Провой кундемыш Марий Оньыжан алмаштышыже Алёна Иванова миен коштын. Тудо Оньыжан лӱмжӧ дене чолга еҥ-влаклан чап кагазым, тауштымашым кучыктен. Тыге Какшамарий ял шотан илемым вуйлатыше Любовь Малыгинам Марий Элысе Кугыжаныш Погынын Чап Кагазше, Чуваш национальный конгресс вуйверын еҥже Эдуард Бахнисовым, библиотекарь, Марий Эл тӱвыран сулло пашаеҥже Галина Сорокинам Кугыжаныш Погынын Тауштымашыж дене палемдыме.

А Волжский район Кӱшыл Азьял школышто публицист, поэт Зиновий Красновлан, писатель, журналист Пётр Корниловлан, журналист, краевед Пётр Красновлан шарнымаш оҥам сакеныт.

Мер Каҥаш лӱм дене чолга меръеҥ Галина Эшкинина калыкым саламлен. Тыгак верысе район администрацийым вуйлатыше Любовь Горшкова, Марий Элысе тӱвыра, печать да калык-влакын пашашт шотышто министерствын печать да тӱшка коммуникаций управленийым вуйлатышын алмаштышыже Иван Андреев, «Марий Эл» газет редакторын алмаштышыже Иван Алексеев поро мутым ойленыт.

Пайремыште Пётр Корниловын ӱдыржӧ да Зиновий Красновын эргыже лийыныт.

Автор: Эльвира Куклина.