Марий калыкын ик эн вучымо да йӧратыме пайремже 15 июньышто Йошкар-Олаште регион-влак кӱкшытыштӧ эртыш. Тушко Марий Элын чыла районжо гыч да марийын илыме моло кундемже гыч тӱрлӧ аланыште тыршыше чолга еҥ-влак толыныт.

90 ий ожно кундемысе статусым налше тиде пайрем Агавайрем кумалтыш дене тӱҥале. Тӱҥ Юмынйӱлан онаеҥже-влак Агавайрем Юмо деч шурно лектышым, илыш перкым, еш пиалым йодын пелештышт.

Вара тӱрлӧ вер гыч усталык коллектив, мер организаций ден калык-тӱвыра мер ушнымаш-влакын еҥышт, колонныш ушнен, Ленин проспект мучко Ленин площадь марте ошкылыныт. Тушто кажне делегацийым поро шомак дене Марий Оньыжа Анатлий Иванов вашлийын. Тыге пайрем «Йоҥгал, марий пайремна! Чаплане, шӱмбел калыкна!» концерт дене торжественно почылтын.

Кӧ молан кертеш! Пеледыш пайрем пашаче да мастар айдемым чапландара. Тиде кечын марий йылмым да литературым туныктышо-влакым, марий национальный школла гыч коллектив-шамычым, эн сай пашаеҥ ден ялозанлыкым, эн чолга мер пашаеҥым саламлышт. Кудо-влак коклаште конкурс лие. Икымше верым Шернур район сеҥен нале.
Тыгак спорт таҥасымаште, чимарий кучедалмаште, йоча модмаште сеҥыше-влак лийыч.

Фольклор ансамбль-влакын мурен-куштымышт, Марий кас, молодёжь программе… Чыла тиде этнодискотеке дене иктешлалте.
Пеледыш пайрем годым марий калык нерген шуко сайым пален налаш лиеш. Тудо шке ойыртемжым тӱрыс почын пуа. Тыгодым вес калыклан гына огыл, а ончыклык марий тукымлан шке йӱлажым, тӱвыражым ончыкта.

Автор: Эльвира Куклина.