2017 ий ага тылзын 26-шо кечынже Татарстан Республикысе марий-влакын калыкле-тӱвыра автономийжым вуйлатыше, Агрыз район Кӧлегеш школым вуйлатыше Третьяков Олег Александрович 60 ийым тема. Саламлена!

Третьяков Олег Александрович Татарстанысе Агрыз район район Кӧлегеш ялыште 1957 ийыште шочын. Ижевскысе (Удмуртий) ялозанлык институтым (1984), Н.К.Крупская лӱмеш Марий пединститутын технолого-экономический факультетшым (1999), ты институт пеленысе аспирантурым (2001) тунем лектын. Татарстан Республикысе калык-влак ассамблей советын еҥже, Татарстан Республик Президент пеленысе наций да конфессий йодыш дене советын членже, Марий Мер Каҥаш вуйлатышын оналмашыже. Педагогика наукын кандидатше. Татарстан Республикын тӱҥ онаеҥже. Марий Эл Республикысе тӱвыран сулло пашаеҥже (2016).

2017 ий ага тылзын 26-шо кечынже Марий Эл Кугыжаныш Погын вуйлатышын алмаштышыжын пресс-секретарьже, Марий Элын сулло журналистше, драматург Петров Александр Алексеевич 50 ийым тема. Саламлена!

Петров Александр Алексеевич Кужэҥер район Кожласола ялеш 1967 ийыште шочын. 1991 ийыште Марий кугыжаныш университетын историй-филологий факультетшым тунем лектын. Фермер озанлыкым вуйлатен (1992-1994), «Марий Эл» газетыште, «Марий Эл» ГТРК-ште, «Кугарня» газетын тӱҥ редакторжылан пашам ыштен (2004-2009). 2009 ий годсек — Марий Эл Кугыжаныш Погын вуйлатышын алмаштышыжын пресс-секретарьже. Россий Журналист ушемын да Россий Писатель ушемын еҥже. «Пьесе-влак» (2008) книгаже, почеламут сборникше савыкталт лектыныт. «Пиал дек кайыыме корно», «Адак омсашек тӱкалат», «Пупкин ӱдырым налеш», «Вашлий мыйым, Шочмо Элем!», «Кронуш» да моло пьесыж почеш спектакльым шындыме.