Мер Каҥашын еҥже-влак 17 январьыште Киров кундем Кильмезь посёлкышто вашлийыныт. Тушто марий поэт, сарзе, туныктышо Фёдор Масловын шочмыжлан 100 ий теме лӱмеш сылне мероприятий эртен.

Эрдене Фёдор Масловын шӱгар ӱмбакыже пеледышым пыштеныт. Вара верысе тоштер дене палдареныт. Оҥай ыле Кильмезь кундемын легендыжым пален налаш. Ик ой почеш, тудым одо-влак шочыктеныт, весыж почеш – марий-влак. Марий-влак дене кылдалтше легенде дене «кильмезь» мут «килмен» мут гыч лектын маныт.

Тыгак тоштерыште чолга марий поэт дене кылдалтше выставкым ончаш лийын. А Фёдор Маслов нерген шуко сай мут сылнымут-сылнысем пайремыште йоҥгалтын. Тудым верысе «Ош пеледыш», «Марий сем», «Фантазий», «Изи памаш» да Марий Эл гыч «Эреҥер» ансамбль-влак, республикын сулло артисткыже Раиса Данилова сӧрастареныт.

Теве Кильмезь районын ӱдыржӧ, кызыт Москосо ик йочасадыште воспитательлан ыштыше Валентина Юхимчук-Дан (Исупова) ачажын шарнымашыжым каласкалыш. Тудын ачажым Фёдор Иванович туныктен, да туныктышо рвезын ушешыже лач поро шарнымашым гына коден. Вет Ф.Маслов йоча-влакын кумылыштым шижын моштен, историй, литератур урок-влакым моткоч оҥайын, шанырнымашеш кодшын эртарен.

А пайрем дене верысе кучем вуйлатыше-влак, Марий Эл гыч мийыше уна-влак саламленыт.

Районышто марий тӱвырам вияҥден колтымо нерген йыргешке ӱстел годым мутланеныт. Тунамак «Кильмезь марий» национально-культурный автономийын пашаж нерген ты организацийым вуйлатыше Наталья Плетенёва каласкален.

Пайрем «Эреҥер» ансамбльын концертше дене умбакыже шуйнен да этнодискотек дене иктешлалтын.

Автор: Эльвира Куклина.
Руш текстым лудаш, видеом, шукырак фотом ончаш лиеш
вес сайтыште: http://mari-arslan.ru/ru/node/542.