Теле тылзын 11 кечынже Пошкырт кундем Уфа олан кугыжаныш концерт залыштыже «Эрвел Марий» Республикысе калыкле тӱвыра автономийынконференцийже эртен. Тушко республикын районла да олала гыч 47 делегат толын.

Конференцийын участникше-влак
Конференцийын участникше-влак

Ушештарена, Пошкырт кундемыште 1989 ий 8 сӱрем (июль) гыч мер ушем «Марий Ушем» лӱм дене пашам ыштен, а 2004 ийыште калыкле тӱвыра автономийыш савырнен. 1995 ий гыч вуйлатышылан Павел Бикмурзин (1951-2020) лийын.

Конференций ондаксе вуйлатышым шарныме тат гыч тӱҥале.

Саламлымаш мут дене Пошкырт кундемысе тӱвыра министрын икымше алмаштышыже Наталья Лапшина, Российысе марий-влакын калыкле тӱвыра федерал автономийын Советшын председательже, Российысе президент пеленсе калык-влакын пашашт шотышто Советын еҥже Лариса Яковлева, Марий Мер Каҥаш вуйлатыше, Оньыжа Эдуард Александров,

Э. В. Александров саламмут дене.
Э. В. Александров саламмут дене.

Пошкырт кундемысе Курултай — Кугыжаныш Погын депутатше, Россий Федерацийын Финн-угор калык-влак ассоциацийын Пошкырт кундемысе пӧлка вуйлатыше, Мордва калыкле тӱвыра рӱдер вуйлатыше Юлия Герасимова, Пошкырт кундемысе калык-влакын келшымаш пӧрт вуйлатыше Ильгиз Султанмуратов ойлышт.

«Эрвел Марий» Пошкырт республикысе калыкле тӱвыра автономийым у еҥ вуйлата., изображение №3
Н. М. Лапшина делегат-влаклан таумутым кучыкта.

«Пошкырт кундемыште илыше марий диаспора — Российыште эн кугу. 2010 ийыште эртыше перепись почеш республикыште 103658 марий ила. Чот почеш Мишкан, Калтаса, Бирск, Шаран, Балтач да Нуриман районлаште ятыр марий ила», – каласыш Наталья Михайловна Лапшина.

Конференцийын участникше-влак лӱмеш саламлымаш телеграмма-влак шуко пуреныт. Нунын коклаште Пошкырт кундемысе калык-влакын ассамблейжым вуйлатыше, Кугыжаныш Думын депутатше Зугура Рахматуллина, Тӱнямбалсе башкир Курултай Президиумын вуйлатышыже Эльвира Аиткулова, Пошкырт кундемысе руш-влакын Соборжо» мер ушем Президиумын вуйлатышыже Валентина Павлова да «Регионысо татар калыкле тӱвыра автономий» мер ушем Советшын вуйлатыше Римма Утяшева деч. Нуно конференцийлан паша лектышым тыланеныт да палемденыт: марий-влак Пошкырт кундемысе калык дене келшен илат, пеҥгыде вий-куатым ончыктат.

Паша кышкар кандаш тӱҥ йодыш деч шоген. Ик эн тӱҥжӧ – мер ушемын вуйлатышыжым сайлымаш да тудын Уставшым пеҥгыдемдымаш. «Эрвел Марий» мер ушемын кум ияш ыштыме пашаж дене вуйлатышын алмаштышыже Раиса Сатаева палдарен. Тудо Пошкырт кундемыште эртаралтше мероприятий-влак нерген да проект паша почеш шийвундым сеҥен налме нерген ойлен.

Р.А. Сатаева отчётым ышта.

Погынышо делегат-влак «Эрвел Марий» калыкле тӱвыра автономийын у председательжым сайленыт. Кум ийлан, шуко йӱк дене самырык, Калтаса районысо Калмиябаш ялыште шочын кушшо, XI Марий калык Погынын делегатше, Мер Каҥашын еҥже Виталий Ялаев сайлалтын. Виталий Георгиевич Пошкырт кундемысе кугыжаныш университетын тунем пытарен, марий мер толкынышто 2006 ий гыч тырша, кызыт ВТБ банкын пӧлкажым вуйлата.

В. Г. Ялаев
В. Г. Ялаев

Конференций у Уставым пеҥгыдемден. Тудын почеш мер ушемын Советше чоҥалтын. Тушко индеш еҥым пуртымо, вуйлатышыже Александр Гайсин, Янаул районысо калыкле тӱвыра автономий правленийын вуйлатышыже. Тыгак мер ушемыш пураш Янаул, Мишкан, Балтач, Бирск, Краснокам, Калтаса, Дюртюли, Шаран районласе да Уфа оласе верысе автономий-влак кумылан лийыныт.

Лончылышаш йодыш-влак коклаште Пошкырт кундемысе калык-влакын ассамблейыш марий калык деч еҥым сайлымаш. Ик ой дене делегат-влак тиде сомылым Байбулатов Валерий Тимиргалеевичлан, Мишкан районысо калыкле тӱвыра автономийын председательжылан ӱшаненыт.

«Эрвел Марий» Пошкырт республикысе калыкле тӱвыра автономий Российысе марий-влакын калыкле тӱвыра федерал автономийыш пураш кумылан лийын. Тугеже гын, Пошкырт марий-влак, ончыко!