2016 ий 15-17 июньышто Финляндийын Лахти олаштыже Финн-угор калык-влакын тӱнямбал кӱкшытан VII когрессышт эртен. Тушто Марий Оньыжа Эдуард Александров, Мер Каҥашын еҥже-влак Михаил Васютин, Валерий Мочаев, Александр Гайсин, Алексей Кудрявцев, Павел Бикмурзин, Раиса Попова лийыныт.

Конгрессыш толшо кажне еҥын шке калык верч чонжо йӱла. А кузе вес семын? Вет илыш ончыкта, финно-угор-влак коклаште калык шагалем толеш. Туге гынат, таче 23 тÿрлö финн-угор калык уло.Нуно йылмыштым, тÿвыраштым, йÿлаштым аралаш тыршат. Теве южгунамже чот изи калыкым ончен, кугешнымаш шочеш, нунын дечат примерым налаш лиеш.

Финн-угор калык-влак ончыко пеҥгыдын ошкылыт мо? Могай йодыш-влак таче нуным тургыжландарат? Кузе умбакыже вияҥаш? Нине да моло пÿсö йодышым Конгрессыште каҥашеныт. Ик погынымаште культурологий доктор, Марий кугыжаныш университетыште тÿвыра да сымыктыш кафедрым вуйлатыше Галина Шкалина «Культурное наследие финно-угорских народов как развитие этноэкологических проектных технологий» теме дене выступатлен.

Моло марий делегат ден эскерыше-влакат тӱрлӧ секцийлаште шке пашашт нерген ойленыт. Чылаже Конгресс годым вич секций лийын, посна погынымаш-влак эртеныт.

Марий Эл нерген шуко сай шонымаш ятыр гана тӱнямбал кӱкшытыштӧ йоҥген. Теве РФ тӱвыра министрын алмаштышыже Александр Журавский пӱтынь финн-угор тӱням саламлымыж годым Марий кундемыштына чоҥалтше культур полат-влак нерген поснак палемден. А Конгресс «Тале вӱд гоч тасмам пыштышым…» марий муро дене мучашлалтын. Тудым Пермь вел гыч, кызыт Тарту университетыште тунемше Анна Мишина эстон артист-влак дене пырля йоҥгалтарен.

Конгресс годымак Финн-угор калык-влакын тӱнямбал консультативный комитетыштын у председательжым сайлышт. Тиде — Карелий гыч Татьяна Клеерова. Тылеч ончыч 24 ий Комитетым Коми Республике гыч Валерий Марков вуйлатен.

Тыге Финн-угор калык-влакын VIII тӱнямбал конгрессышт 2020 ийыште Тарту олаште (Эстоний) лиеш.