«Изи мӧр пеледыш» республикысе йоча пайрем Йошкар-Олаште 2016 ий 1 июньышто эртыш. Тудым вес семынже «йоча Пеледыш пайрем» семынат манаш лиеш. Вет ты шонымашым 2013 ийыште Марий Оньыжа Анатолий Иванов темлен. Тыге тиде сомыл самырыктукымым «Пеледыш пайрем» йӱла дене келгынрак палдараш, марий тӱвыра деке утларак шӱмаҥдаш шукталтын.

Икымше гана «Изи мӧр пеледыш» Советский район Ӱншӱр школ пелен эртен. Кокымшылан – Шернур посёлкышто. Ӱмаште Мер Каҥашыште пунчалым лукмо: тыгай йоча пайремым кок ийлан ик гана ышташ. Ынде кумшо гана тудым Калыкле президент школ-интернат вашлие. Пайремым эртараш Республикысе марий тӱвыра рӱдер ушныш.

Йоча пайремыш республикын куд районжо да Йошкар-Ола гыч ӱдыр-рвезе-влак чумыргышт. Чыланат мотор марий вургемым чиеныт. Мурен-куштен, модын жапым веселан эртарышт. «Юзо тӱня» квест-модышышто вийыштым тергышт.

Нунын дене пырля Кеҥеж, йомакысе моло герой-влак модыч, куанышт, веселитлышт.

Изи мотор падыраш-влакым кугыъеҥ-влак порын саламлышт. РФ Кугыжаныш Думышто еш, ӱдырамаш да йоча-влак йодыш шотышто комитетым вуйлатышын алмаштышыже Лариса Яковлева, Марий Эл Кугыжаныш Погын вуйлатышын алмаштышыже Анатолий Иванов, Туныктыш да шанче министрын икымше алмаштышже Татьяна Гусакова, Тӱвыра, печать да калык-влакын пашашт шотышто министрын алмаштышыже Галина Ширяева, Марий Оньыжа Эдуард Александров да молат шке поро тыланымашыштым ойлышт. Кажныже чолга ӱдыр-рвезе-влакым могай-гынат пӧлек, тауштымаш кагаз дене куандарышт. Тыгодымак тӱрлӧ моло конкурсым иктешлышт.

Тек изи мӧр пеледышна-влак умбакыжат пеледыт, тӱвыргӧ саскан лийыт!

Автор: Эльвира Куклина.
Фото Вероника Созонован.