«Марий калыкын куштымаш-мурымашыжым, йӱлажым, тӱвыражым йоча-влакланат ончыктышаш, нуным чыла тиддеке изинек шӱмаҥдышаш улына. Тыге Пеледыш пайремымат икшыве палышаш, шкежат тушто участвоватлышаш. Лач тыгай мероприятий гоч ме тукым гыч тукымыш йӱланам шуена», — палемдыш Марий Оньыжа Анатолий Иванов 7 июньышто Регион-влак кокласе «Изи мӧр пеледыш» фестиваль годым.

А пайрем Советский район Ӱшнур школ пелен (Марий Эл) икымше гана эртыш. Тудым йоча Пеледыш пайрем семын палемдышт. Тушко республикын 16 школжо гыч 300 наре йоча погынен ыле. Чыланат сылне марий тувыр дене лийыныт.

Тыгай пайремым эртараш шонымаш Ӱшнур школым вуйлатыше Валерий Галкинын шочын. Тудо Мер Каҥашыш темлымаш дене лектын. Тиде пайремым эртарымашке шке надырыштым республикысе образований да наука, тыгак тӱвыра министерство-влакат пыштеныт.

Фестиваль годым йоча-влак «кугу» Пеледыш пайремыште гаяк колонно дене ошкылыныт. Пайремыш толшо кажне школ мурымаш-куштымаш номер дене куандарен, шке ыштыме марий кочкышым, тӱрлӧ ӱзгарым конденыт, ончылгоч пырдыжгазетым ямдыленыт. Тыгак олык пеледыш аршашым погеныт. Нунын кокла гычат эн сайжым ойыреныт. Икшыве-влак йоча модым ончыктеныт, марий модыш-влак дене уло кумылын модыныт.

Пайремын ик тӱҥ шонымашыже: марий йӱлам тукым гыч тукымыш шарен толаш, йоча-влак изинекак шочмо йылмыштым пален, калыкыштым аклен, тӱвырашт дене кугешнен кушшаш улыт.

Вес ийын йоча Пеледыш пайремым Шернур районышто эртараш палемдыме.

Автор: Эльвира Куклина.