21 февральыште, Шочмо йылмын тӱнямбал кечынже, Республикысе марий тӱвыра рӱдер Российысе финн-угор студент ден аспирант-влак ассоциаций дене пырля Мутланымаш-ӱчашымаш клубым эртарен. Каҥашышаш йодышыжо: «Илышыштет – шочмо йылмет». Мутланымашке Мер Каҥаш вуйлатышын икымше алмаштышыже Валерий Мочаев, Мер Каҥаш вуйвер исполкомын еҥже-влак Алесандр Петров ден Эльвира Куклина ушненыт.

Мутланымаш-ӱчашымаш клубын пашаж годым илыш дене кылдалтше ятыр кӱлешан йодышым тарватыме. Тиде – Йошкар-Оласе йочасадлаште, республикысе школ ден вузлаште марий йылмым туныктымаш, шочмо йылме дене туныкташ учебник-влакым лукмаш, ешыште шочмо йылме деке утларак мелын лиймаш, марий йылмым тӱнямбал «эҥыремышвотышто» – Интернетыште – кучылтмаш.

Марий калыкын шке национальный театрже-влак, тӱвыра, калык усталык рӱдерже-влак, шочмо йылме дене газет, журнал лектыт, телевидений ден радио пашам ыштат. Марла книга-влак савыкталтыт, спектакль-влак шындалтыт, марий эстраде вияҥеш, чолга еҥ-влак шочмо йылмым вияҥдаш да шараш интернет-программе-влакым илышыш шыҥдарат. Тыште поснак Андрей Чемышевын тыршымыжым палемдыман. Тудын пытартыш саскаже – марла спел-чекерым ыштымаш; тудо марла чын возымым тергаш полша.

Но мыланна таче у тукым нерген чот шоналташ кӱлеш. Шочмо йылме деке кузе изинекак шӱмаҥдаш – тиде йодыш кызыт путырак пӱсын шога.

Мутланымаш-ӱчашымаш клубыш погынышо-влак тыгай шонымашке шуыныт: чулымъеҥ-влаклан ача-ава-влак дене чӱчкыдынрак вашлийман, нунын дене шочмо йылмын кӱлешлыкше, тудым арален кодымо нерген мутланыман, ӱшандарыман, икманаш, сотемдарыме кугу пашам наҥгайыман. Тыгай пашам кызыт Мер Каҥаш вораҥдарен толеш, тудлан ты суапле пашаштыже полшен шогаш кӱлеш. Мер Каҥашын еҥже-влак пытартыш жапыште гына Шернур да У Торъял районласе школлаште лийыныт, лишыл жапыште республикысе моло школышкат лектыт.