Марий Оньыжа Анатолий Иванов Виче кундемын марий калык тӱвыра кечыштыже лие. Пайрем 27 сентябрьыште Киров олаште эртыш.

Пайремыш ушнышо-влак Владимир Унженинын 70 ияш лӱмгечыж вашеш ыштыме выставкыж дене палыме лийыч. Кумылан-влак ярмингаште кидпаша сатум да марий литературым налын кертыч. Тунамак «Тошто марий тӱр» мастар класс эртыш.

Киров кундемысе усталык коллектив-влакын презентацийышт чумыргышо калыкым тачысе марий тӱвыра нерген шонаш таратыш.

А «Кызытсе жапыште тӱвырам арален кодымаш» йыргешке ӱстелыште Россий Кугыжаныш Думын депутатше Лариса Яковлева марий калыкын федерал калык-тӱвыра автономийыштым ыштыме нерген кумдан каласкалыш.

Вара марий калыкын Киров кундемыште тӱшкан илыме кажне район гыч еҥ-влак мер пашашт нерген каласкалышт.

Тыге йыргеште ӱстелыште иктешлышт: Виче кундемысе кугу марий мероприятий-влакым черет дене районлаште эртараш да кадр-влакым кушташ кугу тӱткышым ойыраш. Самырыкъеҥ-влакым йӧн лийме семын Йошкар-Олашке И.С.Палантай лӱмеш тӱвыра ден сымыктыш колледжыш але Марий кугыжаныш университетыш тунемаш колташ.

Марий калык тӱвыра кече усталык коллектив-влакын гала-концертышт дене мучашлалте. Тушто И.С.Палантай лӱмеш тӱвыра ден сымыктыш колледжысе «Эреҥер» ден «Рвезылык» ансамблят мастарлыкыштым ончыктышт. А»Марий модыш чондай» куштымо-модмо программыш кеч-кӧат ушнен керте.

Тыгак мероприятийыште Марий Эл Республик гыч Марий тӱвыра рӱдерым вуйлатыше Валерий Григорьев, кидмастар-влак Ираида Степанова да Ольга Майкова да молат лийыныт.

Автор: Эльвира Куклина.