Тений пеледыш / июнь тылзын икымше кечынже Пошкырт кундемыште «Марий калыкын этнокультурный ойыртемжым ыштымаште тӱвыран да образованийын рольышт: историй эртыш шотышто ончалтыш» регион-влак кокласе шанче-практик конференций лиеш.
Тудо Башкир кугыжаныш университетын филиалыштыже, Пӱрӧ олаште, эрта да икымше Марий погынын 100 ияш лӱмгечыжлан пӧлеклалтеш.
Конференцийым Башкортостан Республикын тӱвыра министерствыже, Марий Эл Республикын тӱвыра, печать да национальность паша шотышто министерчствыже, Башкир кугыжаныш университетын Пӱрӧ филиалже, В.М.Васильев лӱмеш МарНИИЯЛИ, марий-влакын «Башкортостан Республикысе эрвел марий» национально-культурный автономийышт эртарат.
Шанче-практик конференцийыш чыла кумылан еҥ шке докладшым темлен кертеш. Нунын темышт нине темылан келшен толшаш улыт:
— ХХ курымышто да ХХI курым тӱҥалтыште марий калыкын мер толкын ден историйыштыже лийше кугу проблеме-влак;
— кызытсе тӱвыра аланыште марий тӱвыран, йылмын да религийын верышт;
— сылнымут, фольклор да сымыктыш алан-влакын вияҥмышт ден тӱвыра дене кылдалтмышт шотышто ончыкылыкышт;
— марий калыкын ойыртемже да икгайлыкышт.
Выступатлаш шонышо шымлызе, мер ушемын еҥже, аспирант, магистрант, школысо ден вузысо туныктышо-влак! Шке материалдам да йодмашым, посна файлыш пыштен, электрон йӧн дене 15 май йотке колтыман. Электрон почто-влакын адресышт: БашГУ-н Пӱрӧ филиалышкыже — gareevis@mail.ru да В.М.Васильев лӱмеш МарНИИЯЛИ-ш – marnii@mari-el.ru. Материалым колтымо годым «Первый съезд мари» манын палемдыман.
Конференцийын материалже-влакым электрон да кагаз йӧн дене савыкташ шонат.