9 декабрьыште Йошкар-Олаште Марий кугыжаныш университетын залыштыже Марий Тиште кечылан пӧлеклалтше «Йылме да калык» регион-влак кокласе шанче-практик конференций эртен. Чумыргышо калыкым Марий Оньыжа Анатолий Иванов саламлен. Тыгак Марий Эл Республикысе правительстве вуйлатышын алмаштышыже, тӱвыра, печать да калык- влакын пашашт шотышто министр Михаил Васютин, Марий кугыжаныш университетын ректоржо Михаил Швецов лийыныт. 

Конференцийыш чылаже 60 наре доклад Марий Элысе тӱрлӧ район да ола гыч, Пошкырт, Одо,Чуваш республикыла гыч пурен. Тушеч ятыржым кок пленар погынымашыште да 5 сецийыште колыштмо.

Икымше пленар заседанийыште Ольга Орлова, историй науко кандидат, В.М.Васильев лӱмеш МарНИИЯЛИын пашаенже, «Марий Элыште марий йылмым калык дене кучылталтмаш» нерген докладым ыштен.

Пленарзаседанийын вес докладше –  Венгрийысе Сомбатхей олаште верланыше Константин Филосов лӱмеш университетын профессоржо Янош Пустаин «Российысе финн-угор республиклаше йылме йодыш (ӧрдыж гыч ончымаш)».

Валентина Григрорьева, филологий науко кандидат, Марий кугыжаныш университетын финн-угор йылме-влак кафедрын доцентше «Марий йылмым тунеммаште социолингвистический аспект» нерген каласкален.

Тиде кечынак  200 утла еҥ марий йылме дене диктантым возен. Тыгак шанче-влак «Марий йылме да компьютер: вияҥме корно» йыргешке ӱстелыште шке шонымаштым ойленыт.

10 декабрьыште пайрем Республикысе курчак театрыште умбакыже шуйна (Йошкар-Ола, Царьград проспект, 35 порт). 17 шагатлан «Марий Элын эн сай книгаже – 2014» выставке почылтеш. 18 шагатлан  пайрем кас тӱҥалеш. Диктантым тӱшкан возымаште, «Марий Элын эн сай книгаже – 2014» республикысе VI конкурсышто, «Марнетын шӱдыржӧ» марий сайт да «Ӱдырамаш корно» очерк конкурслаште сеҥыше-влакым саламлат.

Конференцийым ямдыленыт: Марий Эл Республикысе тӱвыра, печать да калык- влакын пашашт шотышто министерствын полшымыж дене Марий тӱвыра рӱдер да Марий кугыжаныш университет.

Автор: Эльвира Куклина.