28-29 ноябрьыште Йошкар-Олаште Мер Каҥашын «Марий форум: шыже сессийже» эртыш. Тушко 100 наре еҥ Марий Элын тӱрлӧ районжо да марийын тӱшкан илыме ятыр регион — Киров, Одо, Пошкырт, Пермь, Татарстан, Угарман кундемла да Санкт-Петербург ола —  гыч толыныт.

Икымше кечын Мер Каҥашын пленумжо лие. Ик эн тӱҥ йодыш самырыктукым дене кылдалте. Ты шотышто тӱҥ докладым Марий Оньыжан алмаштыже Алёна Иванова ыштыш. Тудо тӱрлӧ кундемыште илыше ӱдыр-рвезе-влакым ушышо проект-влакын кӱлешлыкышт нерген ойлыш. Мутлан, марий самырыктукымын Россий кӱкшытан слётшо, «Мый марла ойлем» акций, сылнымут да куштымаш флешмоб. Теве «Кнага — яллан» акций кышкарыште, кок тӱжем наре книгам поген, библиотеке ден тӱвыра тӧнежлашке пӧлекленыт. Форум годымат книга-влакым Одо кундемысе марий самырыктукым «Ӱжара» ушемым вуйлатыше Виктория Папаевалан кучыктышт.

Самырык дене кылдалтше паша нерген моло вер гыч толшо ӱдыр-рвезе-влакат каласкалышт. Теве Татарстанысе марий калык-тӱвыра автономий пелен самырык пӧлкам вуйлатыше Софья Шарабуева ту кундемысе паша дене палдарыш.

Чолга ӱдыр-влаклан Марий Оньыжа Анатолий Иванов Марий Элысе Кугыжаныш Погынын Чап Кагазшым (Виктория Папаевалан) да Таумутым (Софья Шарабуевалан) кучыктыш.

Тиде кечынак Василий Блиновын, Геннадий Григорьевын, Игорь Ивановын, Любовь Михееван, Юрий Морозовын, Раиса Попован да Юрий Юсуповын верысе Мер Каҥаш активын паша лектышыж нерген да Марий Эл ден марий-влак тӱшкан илыме регионла коклаште вашкелшык-влак шотышто уверым колыштыч.

Вес кечын конференций эртыш. «Марий Элыште калык-влак кокласе конфессий кыл: социал паша шынык» темым нӧлтальыч. Тидын нерген Марий Элысе тӱвыра, печать да калык-влакын пашашт шотышто министр Михаил Васютин ойлыш. Тыгак улшо ото-влакым аралыме да у кумалме верым почмо паша шотышто йодышым каҥашышт. Шке ойыштым Марий кундемын тӱҥ онаеҥже Александр Таныгин да моло вер гыч толшо онаеҥ-влак ойлышт.

Марий форум кышкарыштак Марий-влакын Федерал калыкле-тӱвыра автономийым пеҥгыдемдыме конференций лие. Тиде автономийым вуйлаташ РФ Кугыжаныш Думын депутатше Лариса Яковлевалан ӱшанен пуышт.

Тунамак «Марийцы Пермского края» книга презентаций эртарышт.

Марий форумыш толшо-влак «Марий памаш» фольклор ансамбльын юбилей концертышкыже, М.Шкетан лӱмеш Марий кугыжаныш драме театрын 95 ияш юбилейышкыже миен коштыч.

Форум годымак Денис Речкинын «Марий-влак Россий мучко илат» фотосӱрет ончерже пашам ыштыш.

Автор: Эльвира Куклина.