85 ийым темыше чолга марий еҥ-влакым:

— Данилов Виктор Петровичым. 1932 ий 7 декабрьыште Тула областьысе Новая Стройка посёлкышто шочын. Марий композитор, Марий АССР искусствын сулло пашаеҥже (1986), Россий Композитор-влак ушемын еҥже (1972), Олык Ипай лӱмеш молодежный премийын лауреатше (1980), Марий Элын кугыжаныш премийын лауреатше (1982). 1974 ийыште «Марий памаш» ансамбльым чумырымаште тыршен. Тудын вуйлатымыж почеш (1974-1988) ансамбль кугу сеҥымашке шуын да чапым налын.

— Иванов Василий Ивановичым. 1932 ий 7 декабрьыште Морко район Руш Родо ялыште шочын. Шарнымаш книгам ямдылыме шотышто Марий Эл Республикысе тӱвыра, печать да калык-влакын пашашт шотышто министерстве пеленысе республикысе коллегийын паша группыжым вуйлатен (1992). Марий Эл Республикысе тӱвыран (1995) да Российысе тӱвыран (2008) сулло пашаеҥже.

— Арсланов Леонид Шайсултановичым. 1932 ий 11 декабрьыште Татарстан Республик Актаныш район Марий Ямалы ялыште шочын. Филологий науко доктор (1983), Татарстанысе (1991) да Российысе наукын сулло пашаеҥже. Тюркологий ден финн-угор языкознаний йодыш дене 190 утла пашам, тыгак монографийым возен. Озаҥысе федеральный университетын Алабугысо институтышто ректорын советникше.

75 ийым темыше чолга марий еҥ-влакым:

— Ямаева Галина Николаевнам. 1942 ий 6 декабрьыште Параньга район Штрамарий ялеш шочын. М. Шкетан лӱмеш Марий драме театрын актрисыже (1965-2002). Шӱдӧ утла рольым модын, тышеч шукыжо – тӱҥ роль. Марий АССР-ын сулло артисткыже (1977), РСФСР-ын сулло артисткыже (1988). 1993-2004 ийлаште Республикысе тӱвыра да сымыктыш колледжыште театр пӧлкаште театр дисциплине-влакым туныктен.

70 ийым темыше чолга марий еҥ-влакым:

— Зайнутдинов Александр Зайнакаевичым. 1947 ий 21 декабрьыште Пошкырт кундем Краснокам район Арлан селаште шочын. «Мариэнерго» акционер обществын Йошкар-Оласе электросетьыштыже монтёрлан пашам ыштен. Россий Федерацийын сулло энергетикше (1998). Пытартыш жапыште ойлымаш ден пьесе-влакым воза.

— Осипов Валентин Ивановичым. 1947 ий 21 декабрьыште Морко район Кожлаер ялыште шочын. Поэт лӱмжӧ – Ярча. «Ончыко» журналыште пашам ыштен, тӱҥ редакторын алмаштышыже лийын. Марий Эл тӱвыран сулло пашаеҥже (2000), Российысе Писатель ушемын еҥже. Шым прозо ден поэзий книгаже-влак савыкталт лектыныт.

— Малинин Рудольф Сергеевичым. 1947 ий 24 декабрьыште Волжск олаште шочын. Военный науко доктор, профессор. Моско областьыште «Марий Эл землячестве» ушемым вуйлата.

65 ийым темыше чолга марий еҥ-влакым:

— Александрова Галина Николаевнам. 1952 ий Морко район Йошкарэҥер / Краснояр ялеш шочын. 1992-2009 тийлаште Морко районысо рӱдӧ библиотеке системым вуйлатен. Марий Эл Республикысе тӱвыран сулло пашаеҥже (2007). Марий калыкын VIII погынжын делегатше (2008).

— Николаев Виктор Леонидовичым. 1952 ий 9 декабрьыште Морко район Шеҥше / Шиньша селаште шочын. Марий Эл Республикысе тӱвыра министр (1992-1997), марий калыкын Оньыжаже (2000-2004) лийын.

— Порфирьева Зинаида Семёновнам. 1952 ий 5 декабрьыште Медведево район Томшар / Томшарово ялыште шочын. Параньга район Олор школышто 1976 ий годсек тӱҥалтыш класслам туныкта. 2007 ийыште «Эн сай туныктышо» почётан лӱмым сулен.

60 ийым темыше чолга марий еҥ-влакым:

— Садовин Игорь Геннадьевичым. 1957 ий 16 декабрьыште Шернур посёлкышто шочын. 2014 ий годсек Марий Эл Республикысе тӱвыра, печать да калык-влак паша шотышто министерствыште межнациональный ден конфессий кокласе кыл шотышто пӧлкам вуйлата.

— Ясмурзин Юрий Александровичым. 1957 ий 8 декабрьыште Морко район Кугу Вараҥыж / Варангуж ялыште шочын. Морко район Нужключ школышто физикым туныктен, Кугу Вараҥыж ялсоветым вуйлатен (1987-1990). «Йорталте, имнем» книгам савыктен луктын.

— Синицына Светлана Семёновнам. 1957 ий 9 декабрьыште Пермь край Октябрьск район Верх-Тюш ялыште шочын. Кевытче (продавец). Марий калыкын 9-ше погынжын (2012) делегатше.

55 ийым темыше чолга марий еҥ-влакым:

— Алгасов Николай Васильевичым. 1962 ий 16 декабрьыште Курыкмарий район Кӱшыл Солаволкы / Верхние Шелаболки ялеш шочын. Кулаковы селаште ила. Шке гычак (ты мастарлыклан тунемде) сӱретла.

— Дмитриев Владимир Аркадьевичым. 1962 ий 8 декабрьыште Морко район Мызэҥер / Мизинер ялыште шочын. Шочмо велыште школышто туныктышылан, клубышто худруклан да директорлан, 2010 Кугу Шале ял шотан илемым вуйлатышылан пашам ыштен. Марий калыкын Х съездшын делегатше (2016). 2015 ий февраль годсек «Морко районысо клуб системе» тӱвыра тӧнежым вуйлата. «Морко кундем» ансамбльын композиторжо. Марий Элысе Кугыжаныш премийын лауреатше (2009 ий).

— Краснов Василий Владимировичым. 1962 ий 27 декабрьыште Волжск районысо Полатсола ялыште шочын. Мурманскыште ила. Кокымшо ранган капитан. Прозым воза, Писатель ушемлан полышым пуен шога.

50 ийым темыше чолга марий еҥ-влакым:

— Имаева Людмила Алексеевнам. 1967 ий 17 декабрьыште Пошкырт кундем Мишкан селаште шочын. Мишкан районысо историко-культурный рӱдерыште методистлан пашам ыштен (2008-2015). Марий калыкын 9-ше погынжын (2012) делегатше. «Калык верч тыршымаш» медаль дене палемдалтын (Марий Эл, 2013).

— Ильина Надежда Дмитриевнам. 1967 ий 15 декабрьыште Совет район Ловэҥер / Логанер ялыште шочын. 1990 ий годсек Волжск район Карай школышто марий йылмым туныктышо. Почеламут книгам савыктен луктын (2003). «Эн сай туныктышо» лӱмым сулен (2007). 2010 ий годсек Карай тӱвыра пӧрт пеленысе Калык театрын художественный вуйлатышыже.

— Никонова Нина Валерьевнам. 1967 ий 1 декабрьыште Курыкмарий район Коговал / Студёная Колода ялеш шочын. Пайгусово школ директорын алмаштышыже. Районышто ИКН предмет-влакым туныктышо-влакын методобъединенийыштым вуйлатыше. Марий калыкын 10-шо погынжын (2016) делегатше.

Мер Каҥаш вуйвер