70 ийым темыше чолга марий еҥым:

Герасимова Лидия Леонидовнам. Йошкар-Олаште 1948 ий 7 мартыште шочын. Йошкар-Оласе Йоча да самырык-влаклан усталык полатын директоржо (1984-2009). Марий Эл Республикысе образованийын сулло пашаеҥже (1997).

60 ийым темыше чолга марий еҥым:

Илеева Валентина Михайловнам. Свердловск область Арти район Ӱлыл Пардым / Нижний Бардым ялеш 1958 ий 22 мартыште шочын. Ӱлыл Пардым школышто тӱҥалтыш класслам туныктышо. Марий калыкын VII погынжын делегатше (2004).

Илларионова Фаина Сергеевнам. Оршанке район Яндушево ялеш (Тошто Крешын ял деч 3 меҥге тораште верланен улмаш, кызыт ты ял пытен) 1958 ий 23 мартыште шочын. Оршанке посёлкысо 1-ше да 2-шо №-ан йочасадлаште марий йылмым туныктен. Марий йылмым туныктышо-влакын методобъединенийым вуйлатен. Марий калыкын V, VI, IX, X погынын делегатше (2000, 2002, 2012, 2016). 2017 ий 24 мартыште тудын эргыже, офицер-пожарный Эдуард Илларионов, Озаҥысе тарым ыштыме заводышто пудешталтмылан кӧра колен.

Егорова Маргарита Григорьевнам. Пермь кундем Суксун район Сулий / Тебеняки ялеш 1958 ий 23 мартыште шочын. Ачит районысо образований управленийын специалистше. Марий калыкын VII, IX погынын делегатше (2004, 2012).

55 ийым темыше чолга марий еҥым:

Зайцев Пётр Николаевичым. Киров кундем Малмыж район Каменный Ключ ялыште 1963 ий 3 мартыште шочын. Вольыкым да янлык тӱням аралыме управленийым вуйлатен (1998-2001).

Тимиряева Инна Ивановнам. Пошкырт кундем Калтаса район Кӧкыш / Кокуш ялеш 1963 ий 22 мартыште шочын. Калтаса районысо администрацийыште пӧлкам вуйлата. Философий науко доктор. Калтаса районысо мервуй. Марий калыкын VII, IX, X погынын делегатше (2004, 2012, 2016).

50 ийым темыше чолга марий еҥым:

Данилов Александр Викторовичым. Морко район Алсола / Алдышка ялеш 1968 ий 4 мартыште шочын. «Марий Эл» кугыжаныш ансамбльын куштышо артистше. Марий Элын сулло артистше (2000), Марий Элын калык артистше (2007) лӱм-влак дене суапландаралтын.

Петрова Лариса Аркадьевнам. Волжск район Йвансола / Малое Иваново ялеш 1968 ий 5 мартыште шочын. Волжск районысо йоча сымыктыш школышто пашам ыштен. Кызыт Упшер тӱвыра пӧртысӧ филиалыштыже тырша. Марий Эл Республикысе тӱвыран сулло пашаеҥже (2015).

Мер Каҥашын вуйверже.