80 ийым темыше чолгаеҥым:

Владимир Павлович Васильевым. Морко районысо Корамас Нуръялеш 1938 ий 4 ноябрьыште шочын. Поволжский лесотехнический институтым тунем пытарымеке, Озаҥысе сельхоз институтыш пурен (1965). Туштак аспирантурышто тунемын (1970). 1974 ий гыч Марий кугыжаныш университетыште ыштен: доцент, экономике факультетын деканже (1980-86), экономике теорий кафедрын заведующийже (1989-97, 2002-13). Экономике наука кандидат (1971). Марий Эл Республикысе наукын сулло деятельже (1996).

70 ийым темыше чолгаеҥым:

Геннадий Михайлович Мустаевым. Шернур район Мустаево ялеш 1948 ийын 30 ноябрьыште шочын. Тунемме корныжо: Волжск оласе 2-шо ГПТУ, Оршанкысе педучилище, Марий кугыжаныш педагогика институтысо истфак (заочно). 1971 ийын Куярысе кыдалаш школышто туныктышылан ышташ тӱҥалын, 1982 ий гыч – школ вуйлатыше. Кок ий гыч просвещений пашаеҥ-влакын Республикысе профсоюз комитетым вуйлаташ тӱҥалеш. Марий Элысе туныктыш да воспитаний министр (1992-97). 1999-2000 ийлаште Марий Элысе Виктер вуйлатышын алмаштышыже. 2001-10 ийлаште профобразований шотышто Кугыжаныш комитет вуйлатышын икымше алмаштышыже. Марий Элысе образованийын сулло пашаеҥже (1996).

65 ийым темыше чолгаеҥым:

Николай Павлович Кислицыным. Киров кундем Яраҥ район Майский лесоучасткыште 1953 ий 15 ноябрьыште шочын. Суводский чодыра техникумым тунем пытарымеке (1973), Марий Элыш толеш. 1974 ий гыч Моркысо чодыра озанлыкыште тыршаш тӱҥалеш: чодырам аралыше инженер, тӱҥ лесничий (1984 ий гыч), вуйлатыше (2004 ий гыч). Российын сулло лесоводшо (1998). «За заслуги перед Марий Эл» орденын медальже дене палемдалтын (2013).

60 ийым темыше чолгаеҥым:

Вячеслав Анатольевич Кольцовым. Морко районысо Ӱлыл/Нижняя ялеш 1958 ий кылме тылзын 9-ше кечынже шочын. Марий кугыжаныш университетым 1982 ийын тунем пытарен. 2001 ий гыч Марий радиошто пашам ышта. Тыглай редактор гыч вуйлатыше марте кушкын. Марий Эл Республикысе Чапкагаз дене палемдалтын (1995). 2000 ий гыч Марий Элын сулло журналистше лӱмым нумалеш.

55 ийым темыше чолгаеҥым:

Владимир Евгеньевич Геронтьевым. Звенигово олаште 1963 ий 5 ноябрьыште шочын. Марий политехнический институтым тунем пытарымеке (1986), шочмо олаш пӧртылын: ондак Бутяков лӱмеш заводышто мастер, варажым отдел вуйлатыше лийын. 2005 ий гыч Провой кундемысе администрацийыште: вуйлатышын икымше алмаштышыже, 2014 ий гыч администраций вуйлатыше. «За заслуги перед Марий Эл» орденын медальже (2015) да орден (2017) дене палемдалтын.