85 ий дене Виктор Соловьёвым.

Соловьёв Виктор Степанович. Марий Турек район Кугу Вочарма ялеш 1934 ий 19-ше майыште шочын. Марий кугыжаныш педагогике институтым тунем пытарымеке (1955), шочмо районышто туныктен. 1959 ий гыч 1991 ий марте партийсе пашаште. Тиде пагытыште Пеледыш пайремым партий обком гочын илышыш пӧртылтен (1965). 1977-85 ийлаште тыгак МарНИИ-н шанче пашаеҥже лийын, институт пелен социологий пӧлкам чумырен да вуйлатен. 1994-97 ийлаште Марий Элысе Президентын советникше лийын. 2001 ий гыч – Марий кугыжаныш университетыште. Философий шанче кандидат (1971), доктор (1988). 400 утла шымлыме да тунемме-методический пашан авторжо. «Манеш-манеш» мыскара сборникын авторжо (1975, 2007). «Книга памяти», «Они защищали Родину», «Они ковали победу» книга-влакын ответственный редакторжо (1991-2012). Йошкар-Олаште Марий Турек землячествым вуйлатен (2009-17). Российысе Социал шанче академийын действительный членже (1994-99). «За отвагу на пожаре» (1972), «За трудовую доблесть» (1976) медаль-влак дене палемдалтын. МАССР шанчын сулло деятельже (1984). Марий Элысе Чапкагаз дене (1994), Кугыжаныш премий дене (2011) палемдалтын.

80 ий дене Анатолий Бураковым.

Бураков Анатолий Павлович. Приморский край Михайловский район Воздвиженка селаште 1939 ий 14-ше майыште шочын. Тунемме корныжо: Кубаньысе ялозанлык институт (1961), КГБ-н кӱшыл школжо (1975). Агроном, варажым комсомол пашаеҥ лийын. 1973 ий гыч КГБ-ште: Краснодар кундемыште, 1981 ий гыч – Горьковский областьыште служитлен. 1985-96 ийлаште – Йошкар-Олаште: МАССР КГБ-н председательже, Федерал безопасность агентствын вуйлатышыже, Марий Элысе безопасность министр, ФСБ Управленийын начальникше. Арменийыште Российысе ФСБ-н офицал представительже (1997-99). Генерал-майор (1991). МАССР Верховный Советын депутатше (1985-90). «Знак Почёта» (1971), Красная Звезда (1982), 3-шо степенян «Звезда» (Афганистан, 1982) орден-влак дене палемдалтын. МАССР Верховный Совет Президиумын (1989) да Марий Элысе (1996) Чапкагаз-влак дене палемдалтын.

80 ий дене Геннадий Никитиным.

Никитин Геннадий Степанович. Чувашийысе Яльчик район Апанасово-Эщебенево ялыште 1939 ий 31-ше майыште шочын. Поволжский лесо-технический институтым тунем пытарен (1961). Йошкар-Оласе леспромхозын, ММЗ-н инженерже, ВЛКСМ да КПСС горкомын пашаенже лийын. 1972 ий гыч партком секретарьын алмашыже, 1978 ий гыч «Марийский машиностроитель» объединенийын гендиректорын алмашыже, 1985 ий гыч «Кристалл» заводышто. 1992 ий гыч «Геникс» фирмым чоҥен да вуйлатен. 1998 ий гыч предприятийже тӱрлӧ кӱкшытан конкурс-влакын лауреатше лийын. ВВЦ шӧртньӧ медаль дене палемдалтын (2001). Марий Элын Чапкагаз дене (1999), Кугыжаныш премий дене (2001) палемденыт.

70 ий дене Валерий Осиповым.

Осипов Валерий Иванович. Марий Турек район Элымбай ялеш 1949 ий 4-ше майыште шочын. Тунемме корныжо: Оршанке педучилище (1968), Марий кугыжаныш педагогике институт (заочно, 1977), СССР МВД Академий (1983). Шочмо районышто физкультурым туныктышо гыч райком партийын инструкторжо марте кушкын. 1977 ий гыч – милицийыште: РОВД начальник алмаш гыч Марий Элысе МВД-н паспортно-визовый службын вуйлатыше марте кушкын. 2001 ий гыч – Минюст Управленийыште: собственная безопасность пӧлкан специалистше гыч Марий Элысе Тӱҥ судебный пристав марте кушкын. Российысе юстицийын 3-шо классан действительный госсоветникше, генерал-майор (2006). Марий Элын сулло юристше (2000). «За заслуги перед Марий Эл» орденын медальже дене палемдалтын (2007).

70 ий дене Раисия Макаровам.

Макарова Раисия Васильевна. Шернур район Изи Илешъялеш 1949 ий 4-ше майыште шочын. Йошкар-Оласе сылнысем училищым пытарымеке (1972), Маргостеатрын актрисыже лиеш. Мыскара шӱлышан роль-влакым мастарын чоҥен. Нунын кокла гыч Проска («Проска кока ӱдыржым марлан пуа»), Кузи вате («Салика») да молат — чылажге шӱдӧ наре. Марий Элын сулло (1995), калык (2000) артисткыже.

70 ий дене Владимир Никитиным.

Никитин Владимир Илларионович. Морко районысо Устье Шоры посёлкышто 1949 ий 7-ше майыште шочын. 1971 ий гыч Моркысо тӱвыра пӧртыштӧ методистлан ыштен. Марий культпросветучилищым заочно тунем пытарен (1978). 1977 – 2009 ийлаште Республикысе курчак театрын актёржо. Марий Элын (1988) да Российын (2006) сулло артистше. Марий Элын калык артистше (1999). Марий Элысе Кугыжаныш премий дене палемдалтын (2001).

65 ий дене Анатолий Макаровым.

Макаров Анатолий Алексеевич. Юлсер кундемысе Ӱлыл Азъялеш 1954 ий 8-ше майыште шочын. Озаҥ оласе ялозанлык институтым тунем пытарен (1976). 1978 ий гыч шочмо районышто «Эмековский» совхозышто тӱҥ инженер гыч вуйлатыше марте кушкын. 2011-17 ийлаште «Эмеково» ООО-н вуйлатышыже. 2017 ий гыч «Волжский муниципальный районын» главаже, депутат-влак Погынын председательже. Марий Элысе ялозанлыкын сулло пашаеҥже (2014).

65 ий дене Маргарита Кузнецовам.

Кузнецова Маргарита Нифонтовна. Курыкмарий район Чекеево ялеш 1954 ий 9-ше майыште шочын. Тунемме корныжо: Горькийысе йот йылме институт (1976), Тарту университет пеленысе аспирантура (1991). 1992 ий гыч – Венгрийыште: Сомбатхей пединститутышто уралысе филологий кафедрын шанче пашаеҥже, 2003 ий гыч – Западновенгерский университетыште доцент. 2009-14 ийлаште Марий кугыжаныш университетын доцентше. Марий йылмын лексикологийым, лесикографийым, морфологийым да терминологийым шымлен. Филологий шанче кандидат (1993). Филосифий доктор (2008). «Тысячелетие венгерской государственности» ший медаль дене (2001), Марий Элысе Кугыжаныш премий дене (2003) палемдалтын.

65 ий дене Леонид Рыжковым.

Рыжков Леонид Викторович. Килемар район Отар селаште 1954 ий 29-ше майыште шочын. Горькийысе мединститутым тунем пытарымеке (1977), Козьмодемьянскысе рӱдӧ больницыште врачлан тыршаш тӱҥалын. 1979 ий гыч – врач-инспектор, 1983-92 ийлаште – здравоохранений министрын алмашыже; ОМС Фондын исполнительный директорын алмашыже. 1995 ий гыч – Республикысе больницын тӱҥ врачын алмашыже. 1996 ий гыч Йошкар-Ола Администрацийыште здравоохранений пӧлка вуйлатыше, министрын алмашыже. 1997-2001 ийлаште – здравоохранений министр. 2001 ий гыч катастрофа дене кылдалтше рӱдерым вуйлатен. 2003 ий гыч Йошкар-Оласе медколледжым вуйлата. Марий Элын сулло врачше (2004). Российысе здравоохраненийын сулло пашаеҥже (2010).

50 ий дене Валентин Васюковым.

Васюков Валентин Борисович. Пошкырт вел Калтаса район Ӱлыл Качмаш ялеш 1969 ий 9-ше майыште шочын. Марий политехнический институтым тунем пытарен (1993) да Калтасаште фирмыште снабженецлан ыштен. 1994 ий гыч – уэш Йошкар-Олаште: «Ланар» агентствыште рекламе дене консультант, 1996 ий гыч – «Телец» магазинын директоржо. 2010 ий гыч – «Доброе» пиломатериалым ыштыше да чоҥымаш пашаште полышым пуышо организацийын вуйлатышеже. 2005 ий гыч эрвел марий-влакын «Ош Виче» землячествын председательже. 10-шо марий калык погынышто эскерыше лийын (2016).

50 ий дене Владимир Айметовым.

Айметов Владимир Иванович. Свердловск кундем Красноуфим район Руш Тавра ялеш 1969 ий 17-ше майыште шочын. Тунемме корныжо: Красноуфимысе совхоз-техникум (1990), Уралысе ялозанлык академий (заочно, 2007). Паша корныжо «Тавринский» совхозышто тӱҥалын, механик сомылым шуктен. 1994 ий гыч – бизнесыште, 1998 ийыште уэш ялозанлык дене кылдалтын. Куд тӱжем утла гектар мландыщте пакчасаскам кушта. 2004 ийыште Свердловск кундемын эн сай фермерже семын палемдалтын.