80 ий дене Геннадий Апаевым.

Апаев Геннадий Апаевич. Пошкырт кундем Мишкан районысо Чураево селаште 1939 ий 1-ше августышто шочын. Тунемме корныжо: Озаҥысе химико-технологический институт (1964), Москосо инженерно-экономический институт (заочно, 1969). Паша корныжо Марий политех дене кылдалтын: доцент, 1994 ий гыч профессор. Тӱрлӧ тунемме пособий-влакын, монографийын авторжо. Марий Элысе шанчын сулло деятельже (2005).

80 ий дене Валентина Добрынинам.

Добрынина Валентина Николаевна. Татарстан кундем Менделей районысо Элнет ялыште 1939 ий 25-ше августышто шочын. Шинчымашым Пошкырт мландысе Эльян педучилищыште поген. Тудо кундемысе школлаште туныктен. Муро дене илышыжым кылдынеже улмаш. Йошкар-Оласе мурсем училищыште шинчымашым погаш толеш да 1968 ий гыч 2003 ий марте Оршанке педучилищыште музыкым вӱда. Шинчымашым Москосо тӱвыра институтышто келгемден. Тӱрлӧ ийлаште районысо «Вис-вис», «Ошла сем» ансамбль-влакым вуйлатен. Районысо «Марий ушемын» председательже лийын. Кызыт Мер Каҥаш активын еҥже улеш. Марий Элысе тӱвыран сулло пашаеҥже (1992).

75 ий дене Владимир Унжениным.

Унженин Владимир Васильевич. Киров кундем Пижанка районысо Тараканово ялеш 1944 ий 20-шо августышто шочын. Марий кугыжаныш педагогике институтым тунем пытарымеке(1971), Медведево районысо Южинский школын вуйлатышыже лийын. 1975-2014 ийлаште шочмо районысо Мари Ошай школышто туныктен да вуйлатен. Тыгак сӱретче семын палыме. Персональный ончер-влакше Йошкар-Олаште, Кировышто лийыныт. Мер Каҥашын еҥже (1996-2000). 2009 ий гыч АФУН регион пӧлкан председательже. Марий Элысе тӱвыран сулло пашаеҥже (2010). «Родительская слава» орденын медальже дене палемдалтын (2016).

70 ий дене Евгений Чучалиным.

Чучалин Евгений Николаевич. У Торъял районысо Чернозелье ялеш 1949 ий 6-шо августышто шочын. Тунемме корныжо: Йошкар-Оласе медучилище (1968), Марий кугыжаныш пединститут (1978), Марий совхоз-техникум (1989), Угарманысе социал-политик институт (1992). Паша корныжо шочмо район дене кылдалтын: ФАП-ым вуйлатен, школышто туныктен, партий пашам шуктен, 1988 ий гыч – РИК-ын председательже, 1991-93 ийлаште – районысо Администрацийын вуйлатышыже, варажым икымше алмаштыше. 1997 ий гыч кызыт мартеат Российысе Пенсионный Фондын районысо пӧлкажым вуйлата. МАССР Кӱшыл Советын депутатше (1990-93). Марий Элысе Чапкагаз дене палемдалтын (1999).

70 ий дене Геннадий Ямбаршевым.

Ямбаршев Геннадий Анатольевич. Шернур районысо Кондрачи ялеш 1949 ий 6-шо августышто шочын. Тунемме корно: Москосо специальный кыдалаш милиций школ (1973), СССР МВД-н Киевысе кӱшыл школ (1980). 1970 ий гыч Йошкар-Олаште милиционер, 1973 ий гыч – эксперт. Варажым экспертно-криминалистический пӧлка-влакым вуйлатен: 1993 ий гыч – Йошкар-Оласе УВД, 1996-2000 ийлаште Марий Элысе МВД. Полковник. Марий Элын (1994), Российын (1999) сулло юристше.

70 ий дене Зосим Мартьяновым.

Мартьянов Зосим Петрович. Курыкмарий районысо Афонькино ялеш 1949 ий 11-ше августышто шочын. Энгельс оласе 34-ше номеран ГПТУ-м тунем пытарен (1967). Киномеханик, контролёр-монтёр сомылым шуктен. 1994 ий гыч – Курыкмарий районысо «Жера» газетын редакцийыштыже. Телымсе полиатлон дене индеш гана Марий Элын чемпионжо лийын. Курыкмарий районышто ятыр спорт мероприятийын организаторжо. Кызытат спорт дене кылым куча – куршталеш.

70 ий дене Игорь Ельмекеевым.

Ельмекеев Игорь Иннокентьевич. У Торъял районысо Пеледыш ялыште 1949 ий 18-ше августышто шочын. Марий Турек районысо 5-ше номеран СПТУ тунем пытарен. Икмыняр ий ача-аваж дене Казахстаныште илен. 1975 ий гыч Йошкар-Оласе стройкылаште пашам ыштен. 1983-87 ийлаште Горький олаште партийысе кӱшыл школым тунем лектын. Ленинский да Медведевский райком партийын инструкторжо лийын. 1990 ий гыч – партком секретарь, Ленин лӱмеш колхоз профкомын председательже. 1997 ий гыч – агропромышленный комплекс пашаеҥ-влакын профсоюз рескомым вуйлатен. 1996-99 ийлаште Российысе Кугыжаныш Думын депутатше Н.И. Поляковын полышкалышыже лийын. Шуко шочшан ешын ачаже.

70 ий дене Юрий Алексеевым.

Алексеев Юрий Валерьевич. Морко районысо Кугу Шоръялеш 1949 ий 26-шо августышто шочын. Тунемме корныжо: Республикысе культпросветучилище (1968-69), Луначарский лӱмеш театральный сымыктыш институт (1969-74). Паша корныжо: 1974 ий гыч – Шкетан лӱмеш театрын актёржо. Ик идалык (1975-76) Совет Армийыште служитлен. 1991 ий гыч – Марий ТЮЗ-ын директоржо, 1993-2010 ийлаште — Марий Элысе Виктерыште тӱвыра да сымыктыш йодыш-влак дене консультант. Кызыт уэш Шкетан лӱмеш театрыште артист сомылым шукта. МАССР-ын сулло артистше (1989). Российысе тӱвыра министерствын Чап кагазше дене (2001) да моло награде-влак дене палемдалтын. Калык артист Роман Алексеевын ачаже.

70 ий дене Лев Захаровым.

Захаров Лев Леонидович. Курыкмарий районысо Митряево ялеш 1949 ий 29-ше августышто шочын. Горькийысе ялозанлык институтым тунем пытарен (1973). Шочмо районыштыжо «За коммунизм» колхозышто участкын начальникше гыч «Россия» колхоз председатель марте кушкын (1975-79). 1980-96 ийлаште – «Волга» совхоз вуйлатыше, 1996-2001 ийлаште – районысо Администраций вуйлатышын икымше алмашыже, 2001-08 ийлаште – Козьмодемьянскыште Мингосимуществын вӱдышӧ специалистше. Марий Элысе ялозанлыкын сулло пашаеҥже (1992).

65 ий дене Алевтина Осиповам.

Осипова Алевтина Фёдоровна. Провой кундемысе Дубовка ялеш 1954 ий 2-шо августышто шочын. 1976 ий гыч 2012 ий марте – курчак театрыште. Пашам ыштымыж годым шинчымашым келгемден: Марий культросветучилище (1979), Санкт-Петербургысо музыка да кино театр институт (1992). Ятыр рольым чоҥен. Лирический образ-влак чонжылан лишылрак лийыныт. Марий Элын сулло артисткыже (1999).

65 ий дене Альбертина Аптуллинам (Ивановам).

Аптуллина (Иванова) Альбертина Петровна. Куженер районысо Шойдум ялеш 1954 ий 11-ше августышто шочын. Марий кугыжаныш университетым тунем пытарен (1977). Марий радиошто редакторлан ыштен. Варажым «Ончыко» журналыште: редактор, тӱҥ редактор. 1996-2000 ийлаште Марий книга савыктышым вуйлатен. 2003 ий гыч «Ото» савыктыш пӧртын вуйлатышыже. «Марий Эл – Суоми» обществын председательже (1995 ий гыч). Ятыр книга-влакын авторжо. «Соната для скрипки соло» сборникше Эстонийыште, Венгрийыште тӱрлӧ йылме дене лектын. Тӱрлӧ финн-угор автор-влакым марий йылмыш кусарен. Ятыр почеламутшылан семым келыштарыме. Олык Ипай лӱмеш марий комсомол премий дене палемдалтын (1988). Марий Элысе сымыктышын сулло деятельже (1998).

65 ий дене Виталий Шабыковым.

Шабыков Виталий Иванович.  Шернур районысо Поташково ялеш 1954 ий 12-шо августышто шочын. Тунемме корныжо: Марий политех институт (1976), СССР АН пеленысе социологий шымлыше институтышто аспирантура (1987). 1976 ий гыч МарНИИЯЛИ-ште: тыглай шанче пашаеҥ гыч вуйлатышын алмаштышыже (1997-2000) марте кушкын. Варажым социологий пӧлкан вӱдышӧ шанче сотрудникше лийын. Философий шанче кандидат (1987). Марий Элысе шанчын сулло деятельже (2014).

65 ий дене Анатолий Ишалиным (Анатолий Тулай).

Ишалин Анатолий Сергеевич. Пошкырт кундем Мишкан районысо Нововаськино ялеш 1954 ий 29-ше августышто шочын. Марий кугыжаныш университетым тунем пытарен (1980). Пошкырт мландыште туныктен, комсомол пашам шуктен. 1985 ий гыч МАССР шинчымаш аланыште тыршен: Волжский ронон инспекторжо гыч Российысе образованийыште законым шуктымо дене кылдалтше надзор да контроль пӧлкан экспертше марте кушкын (2009-14). Педагогике шанче кандидат (2003). Петровский шанче да сымыктыш академийын член-корреспондентше (2005). Ятыр произведенийын, «Пиалан лийза!» роман-трилогийын (2013) авторжо.

60 ий дене Сергей Речкиным.

Речкин Сергей Владимирович. Йошкар-Олаште 1959 ий 4-ше августышто шочын. Йошкар-Оласе сылнысем училищым тунем пытарен (1978). Паша корныжо Куженерыште тӱҥалын. 1983-2005 ийлаште Йошкар-Олаште «Гармонь», «Сударушка» ансамбль-влакын концертмейстерже, «Калинушка» ансамбльын худрукшо. 1994 ий гыч Бауманский лицей пеленысе сымыктыш школышто туныкта. Баян, тӱрлӧ калык семӱзгаз дене мастарын шокта. Марий Элысе (1995), Российысе (2010) тӱвыран сулло пашаеҥже.

60 ий дене Татьяна Алдровам.

Алдрова Татьяна Васильевна. Провой кундемысе Марий Отар ялеш 1959 ий 5-ше августышто шочын. Горькийысе мединститутым тунем пытарен (1982). Паша корныжо Республикысе кожный диспансерыште тӱҥалын. 1988 ий гыч – Звенигово районысо больницын врачше. 1999 ий гыч – Звенигово районысо военкоматыште кугурак врач. 2001 ий гыч Звениговысо линейный больницыште терапевтический отделенийым вуйлата. Марий Элысе Кугыжаныш Погынын депутатше (2000-04).

60 ий дене Юрий Биктугановым.

Биктуганов Юрий Иванович. Свердловск кундем Красноуфимск районысо Кӱшыл Бугалыш ялеш 1959 ий 8-ше августышто шочын. Свердловскысо пединститутым тунем пытарен (1980). Шочмо районышто Саргаинский, Приданниковский школ-влакым вуйлатен, 1997 ий гыч образований виктемын вуйлатышыже. 2004 ий гыч Красноуфимск оласе вуйлатышын алмаштышыже. Ик ий утла Свердловск кундемысе Виктер вуйлатышын алмаштышыже лийын. 2011 ий гыч образований министр сомылым шукта. Педагогике шанче кандидат (2013). Свердловск кундемысе Виктерын Чапкагазше дене палемдалтын (2001).

60 ий дене Софья Чесноковам.

Чеснокова Софья Петровна. Пошкырт кундем Дюртюли районысо Байгильдино ялеш 1959 ий 9-ше августышто шочын. Тунемме корныжо: Сылнымут институт (1983), Тарту университетысе магистратура ден докторантура (1990-97). Паша корныжо МарНИИЯЛИ-ште тӱҥалын. 2001 ий гыч Марий кугыжаныш университетыште: кугурак туныктышо, доцент. Финн-угор калык-влакын сылнымутыштым шымлен. Коло утла пашан авторжо, нунын кокла гыч иктыже – «Марийская поэма». Филологий шанче кандидат, уралысе йылме-влак дене философий доктор (1998). 2010 ий гыч – Финляндийыште йот калыклан финн йылмым тунемаш полша.

60 ий дене Эльвира Гайсинам.

Гайсина Эльвира Владимировна. Пошкырт кундем Янаул районысо Атлегач ялеш 1959 ий 16-шо августышто шочын. Марий кугыжаныш пединститутым тунем пытарымеке (1981), шочмо кундемысе Рабак школ дене паша корныжым кылда. 34 ий тунемше-влакым руш да марий йылме, сылнымут деке шӱмаҥден. 2008-16 ийлаште Рабакыште Барабановский кыдалаш школын филиалжым вуйлатен. Российысе образований да шанче министерствын Чапказше дене палемдалтын (2013). Российысе туныктыш пашан ветеранже.

60 ий дене Нина Романовам.

Романова Нина Никандровна. Киров кундемысе Вятские Поляны олаште 1959 ий 17-ше августышто шочын. Шочмо олаштыже «Этномир» калыкле тӱвыра рӱдерым чумырен да вуйлата. 10-шо марий калык погынын делегатше (2016).

60 ий дене Любовь Горшковам.

Горшкова Любовь Васильевна. Провой кундемысе Исменцы ялеш 1959 ий 23-шо августышто шочын. Марий политех институтым тунем пытарен (1981). Паша корныжо Юлсер район дене кылдалтын. Приволжский ДСПМК-ше мастер гыч гендиректор марте кушкын. 1999 ий гыч районысо Администрацийыште: экономике пӧлкам вуйлатыше, 2001 ий гыч – вуйлатышын алмашыже, 2012 ий гыч – вуйлатышын икымше алмашыже. Ик ий Администрацийым вуйлатен. Марий Элысе Чапкагаз дене (2010), «За заслуги перед Марий Эл» орденын медальже дене палемдалтын. Марий Элысе муниципал службын сулло пашаеҥже (2015).

55 ий дене Евгений Петровым.

Петров Евгений Леонидович.Морко районысо Алдышка ялеш 1964 ий 17-ше августышто шочын. Марий кугыжаныш пединститутым тунем пытарен (1985). 1992 ий гыч Совет районысо ДЮСШ-то тренер. 1996 ий гыч – Йошкар-Олаште. Футболла модшо ӱдыр командым чумырен да 2010 ийыште кокымшо лигыш луктын. Командым «Мариэлочка» лӱм дене палена. 2006 ийын элнан эн сай шӱдӧ тренер коклаште. Марий Элын сулло тренерже (2005).

55 ий дене Лидия Смирновам.

Смирнова Лидия Никаноровна. Курыкмарий районысо Митряево ялеш 1964 ий 21-ше августышто шочын. Озаҥысе тӱвыра институтым тунем пытарен. Шочмо районышто тӱвыра аланыште тыршен: ялысе, районысо тӱвыра пӧртлам, районысо тӱвыра пӧлкам вуйлатен, районысо Администраций вуйлатышын алмашыже лийын. 2014-18 ийлаште Евсеев лӱмеш тоштерын вуйлатышыже. Мер Каҥашын еҥже (2008-16). Марий Элысе тӱвыран сулло пашаеҥже (2011).

50 ий дене Вадим Пазугутовым.

Пазугутов Вадим Владимирович. Пошкырт кундем Калтаса районысо У Оръебаш ялеш 1969 ий 3-шо августышто шочын. Нефтекамскысе 139-ше номеран ПТУ-м (1987), Уфимысе механико-технологический колледжым (2009) тунем пытарен. Заводышто пашам ыштен, ялысе клубым вуйлатен. Кызыт шочмо районышто Тюльдинский сельсоветым вуйлата. 10-шо марий калык погынын делегатше (2016).

50 ий дене Светлана Осипова-Шосым.

Осипова-Шос Светлана Владимировна. Пошкырт кундем Калтаса районысо Ӱлыл Качмаш ялеш 1969 ий 6-шо августышто шочын. Марий филармонийын солисткыже (2000 ий гыч). «В кругу друзей» порылыкым ончыктышо концерт-влакын организаторжо семын палыме. Погымо окса черле йоча-влаклан колталтеш. Марий Элын сулло (2008), калык (2018) артисткыже.