70 ий дене Анатолий Мокеевым.

Мокеев Анатолий Иванович. Куженер районысо Чашкаялеш 1949 ий 28-ше декабрьыште шочын. Оршанке педучилищым тунем пытарен (1968). Ялыште туныктен, «Торгмаш» заводышто ыштен. 1975 ий гыч – Шернурысо ДРСУ-то. Сылнымут поянлыкше: кум поэтический сборник, «Тиде лийын, лийын…» шанымашан повесть (1996), «Усталык памаш» (1994) да «Анкет» (1999) поэме-влак, «Шып сонар» пӱртӱс нерген повесть (2002). 2000 ийын А. Спиридоновын «Югорно» эпосым мастарын марий йылмыш кусарен.

1998 ий гыч Российысе писатель-влак ушемын еҥже. Марий Элысе Виктерын Чапкагаз дене палемдалтын (1998).

65 ий дене Вениамин Захаровым.

Захаров Вениамин Александрович. Морко районысо Казанский почиҥгаште 1954 ий 12-шо декарьыште шочын. Музыкально-художественный школ-интернатым тунем лекмеке (1969), Йошкар-Оласе сылнысем училищыште тунемын (1973). Озаҥысе консерваторийыште шинчымашым келгемден (1978). Паша корныжо руш драме театр дене (1982 ий гыч), курчак театр дене (1987 ий гыч) кылдалтын ыле. 2013 ий гыч – Марий ТЮЗ-ышто сылнысем пӧлкам вуйлата. Ятыр симфоний да камер произведенийым, йоча-влаклан хоровой музыкым возен, шуко муро да спектакльлан семым келыштарен. Кум муро сборникше лектын (1989, 1993, 2000). Олык Ипай лӱмеш марий комсомол премий дене (1986), МССР Кугыжаныш премий дене (1991) палемдалтын. Марий Элысе сымыктышын сулло деятельже (1996)

65 ий дене Арсений Яйцовым.

Яйцов Арсений Арсеньевич. Курыкмарий районысо Усолаште 1954 ий 25-ше декабрьыште шочын. Йошкар-Оласе сылнысем училищым тунем лектын (1974). 1982 ий гыч шочмо районысо «Шанавӹл» Сарапаевский фольклор ансамбльын аккомпаниаторжо. Гармонь дене устан шокта. Шке мутшо почеш, 2000 утла концертын участникше. МАССР (1989) да Российысе (1999) тӱвыран сулло пашаеҥже. Марий Элысе Кугыжаныш премий дене палемдалтын (1993). 1999 ийын О. Красильников тудын нерген «Пленник гармони» книгам луктын.

60 ий дене Елена Семёновам.

Семёнова Елена Викторовна. Морко районысо Ӱшӱт тӱр ялеш 1959 ий  1-ше декабрьыште шочын. Тунемме корныжо: Йошкар-Оласе медучилище (1979), Марий кугыжаныш университет (1985). 25 ий Арын ФАП-ште тыршен. Варажым ял шотан кучем-влакым вуйлатен: 2006-10 ийлаште Арын, 2010 -17 ийлаште – Коркатово. Ик ий наре Чодраялысе клубышто сылнеше вуйлатышылан ыштен. Тений гыч Арын кыдалаш школышто биологийым туныкта. Яра жапыште почеламутым воза. Тыге 2002 да 2003 ийын кок почеламут сборникше лектын гын, 2019 ийын йоча-влаклан «Ковамын кудывечыштыже» почеламут сборникше савыкталтын. Коло ий наре районысо собранийын депутатше лийын. 2013 ийын маршал В.Чуйков медаль дене палемдалтын. Марий калыкын 7-10 погынлан делегатше лийын (2004-16).

60 ий дене Надежда Лежнинам.

Лежнина Надежда Алексеевна. Оршанке районысо Изи Ӧрша ялеш 1959 ий 8-ше декабрьыште шочын.  Марий кугыжаныш университетым тунем лектын. Паша корныжо шочмо районысо Кугу Ӧрша школышто тӱҥалын (1985-91). 1991 ий гыч – районысо «Вперёд» газетыште: корреспондент, верысе радиовещанийын редакторжо, тӱҥ редактор. 2013 ий гыч – Упшо школышто: марий йылмым туныктышо, 2017 ий гыч – вуйлатыше. Марий ушемын еҥже (1991-2002). 2003 ий гыч «Марий калык конгрессын» еҥже. Мер Каҥашын Чапкагазше дене палемдалтын. Марий калыкын погынлаште ик гана веле огыл делегатше лийын.

60 ий дене Геннадий Богдановым.

Богданов Геннадий Владимирович. Куженер районысо Кӱшыл Нольдӱр / Верхний Нольдур ялеш 1959 ий 10-шо декабрьыште шочын. Марий кугыжаныш пединститутым заочно тунем пытарен (1987). Паша корныжо 1981 ий гыч ялозанлык министерствыште тӱҥалын: инженер сомылым шуктен. 1991 ий гыч «Авангард» рӱдерын, 1992 ий гыч — «Марийброкинформ» фирмын вуйлатышыже. 1995 ий гыч – «Марита-Меско» СП-н гендиректоржо. 2000 ий гыч уэш ялозанлык министерствыште – пӧлка вуйлатыше. 2001 ий гыч Йошкар-Оласе аграрий колледжын (2011 ий гыч Марий политехник университетын подразделенийжын) вуйлатышыже. Ялозанлык шанче кандидат (2005) Марий Элысе ялозанлыкын сулло пашаеҥже (2009). Моло шанчыеҥ-влак дене пырля агротехнике дене кылдалтше монографий-влакым возымылан Марий Элысе Кугыжаныш премий дене палемдалтын (2009).

60 ий дене Алевтина Танеровам.

Танерова Алевтина Николаевна. Шернур посёлкышто 1959 ий 12-шо декабрьыште шочын. Шернур районысо образований пӧлкам вуйлатен (2008-15). Районысо эмлыме верын психологшо. Марий калыкын 9-ше погынын делегатше лийын (2012).

60 ий дене Анатолий Ивановым.

Иванов Анатолий Петрович. Юлсер кундемысе Ярамарий ялеш 1959 ий 15-ше декабрьыште шочын. Шабыково ялын старостаже. Марий калыкын 10-шо погынын делегатше (2016).

60 ий дене Юрий Антюшиным.

Антюшин Юрий Николаевич. Морко районысо Курыкйымал ялеш 1959 ий 14-ше декабрьыште шочын. Школым тунем пытарымеке (1977) сельхоз техникыште слесарьлан пашам ышташ тӱҥалеш. Армийыште служитлымеке пашажым туштак шуя: участок вуйлатышын алмаштышыже марте кушкеш. Шинчымашым Йошкар-Оласе ялозанлык техникумышто (1983-86, заочно), Угарманысе кугыжаныш службо академийыште (2002-08, заочно) келгемден. 2001-2010 ийлаште Морко посёлкысо администрацийым вуйлатен.  2010-15 ийлаште – «Тепло-водоканалыште»: автомеханик гыч вуйлатыше марте. Кызыт Морко районысо Зеленогорский ял кундемын вуйлатышыже (2015 ий гыч). Марий кундемысе ВС-н депутатше (1990-93). Марий калыкын 8-ше погынын делегатше (2008).

60 ий дене Ольга Исинбаевам.

Исинбаева Ольга Павловна. Пошкырт кундем Краснокам районысо Кариево ялеш 1959 ий 29-ше декабрьыште шочын. Сулен налме канышыште. «Мари» рӱдерын вуйлатышыже. Марий калыкын 10-шо погынын эскерышыже лийын (2016).

55 ий дене Нина Кулалаевам.

Кулалаева Нина Алексеевна. Медведево районысо Шеклянур ялеш 1964 ий 16-шо декабрьыште шочын. Российысе образований министерстве пеленсе образованийыште калыкле проблемым шымлыше институтын марий филиалжым вуйлатен. «Методика обучения учащихся начальных классов марийскому языку» диссертацийым арален. Педагогике шанче кандидат.

55 ий дене Антонида Елизаровам.

Елизарова Антонида Васильевна. Юлсер кундемысе Пӱнчесолаште 1964 ий 23-шо декабрьыште шочын. Музыкально-художественный школ-интернатым тунем пытарымеке (1980), Йошкар-Оласе сылнысем училищыш пура. Варажым Озаҥысе тӱвыра да сымыктыш университетыште шинчымашым келгемда. Паша корныжо Калыкле президент сымыктыш школ дене кылдалтын. Ятыр ий йоча-шамычым музык деке шӱмаҥда, калык семӱзгар оркестрым вуйлата. 2012 ийын эн сай тукыктышыжо лийын.

55 ий дене Вячеслав Воронцовым.

Воронцов Вячеслав Петрович. Совет районысо Кӧрдемтӱр ялеш 1964 ий 30-шо декабрьыште шочын. Марий кугыжаныш политехник университетым (заочно, 1997), Волго-Вятске кугыжаныш службо академийым (2005) тунем лектын.  МАССР МВД-н пашаеҥже лийын. 1993 ий гыч «Плёс» фирмым почын да вуйлатен. 2001 ийын Марий Элын чолга бизнесъеҥже семын тудым калык палемден. Шукыштлан поро кумылым ончыктен надырым пуэн. Марий Элысе Кугыжаныш Погынын депутатше (2000-09, кок созыв). Мер Каҥашын еҥже (2002-12, кум созыв).

50 ий дене Любовь Абукаевам.

Абукаева Любовь Алексеевна. Пошкырт кундем Мишкан районысо Новоключево ялеш 1959 ий 255-ше декабрьыште шочын. Марий кугыжаныш университетым отличий дене тунем пытарен (1992) да тыштак пашам ышташ кодын. Руш йылме кафедрыште: туныктышо, кугурак туныктышо, 2001 ий гыч – доцент, 2006 ий гыч – профессор. Филологий шанче доктор (2005) 2019 ий 1-ше октябрь гыч МарНИИЯЛИш куснен: этнологий пӧлкан тӱҥ шанче пашаеҥже. Шымлымаш пашаже-влак руш да марий йылме синтаксис дене кылдалтыныт. Марий ойӧрым шымлен. Эрвел марий-влакын сӱан да уна муро-влакым руш йылмыш кусарен савыктен. А. Чемышев да А. Митрускова дене пырля «Словарь сравнений марийского языка» книгам ямдыленыт (2019).