85 ий дене Альберт Смирновым.

Смирнов Альберт Фатеевич. Курыкмарий районысо Чаломкино ялеш 1934 ий 4-ше июльышто шочын. Тунемме корныжо: Козьмодемьянск оласе педучилище (1954), Марий кугыжаныш педагогике институт (1959). Шочмо районышто туныктышо, воспитатель лийын, тӱрлӧ кружокым вӱден. 1961 ийын Еласы селаште краеведений тоштерым почын, кудыжо 1985 ий гыч калык лӱмым нумалеш. 1997 ийын тоштер петыралтын. 5000 утла тоштер арверым Григорьев лӱмеш тоштерыш пуэн. Шочмо районысо ятыр лӱмлыеҥ-влак нерген биографий материалым поген.

80 ий дене Раиса Курзенёвам.

Курзенёва Раиса Васильевна. Шернур районысо Мошкино ялеш 1939 ий 2-шо июльышто шочын. Кыдалаш шинчымашым налын. Паша корныжо Марий машиностроительный завод дене кылдалтын: 1958 ий гыч – пашазе, 1965-92 ийлаште – гальваник. РСФСР Кӱшыл Советын депутатше (1985-90). 3-шо степенян Трудовая Слава орден дене палемдалтын (1984).

70 ий дене Нина Зоринам.

Зорина Нина Николаевна. Шернур районысо Ахматэҥер ялеш 1949 ий 17-ше июльышто шочын. Марий кугыжаныш педагогике институтым тунем пытарен (1971). Тӱрлӧ ийлаште туныктышо, завуч, роносо методистлан тыршен. 1975 ий гыч партий пашаште: Провой кундемысе комсомол партийын кокымо, икымше (1978-80) секретарьже. Горькийысе кӱшыл партий школым тунем лекмеке (1982), Куженерыште: райком партий пӧлкан вуйлатышыже, райисполком вуйлатышын алмаштышыже. 1987 ий гыч Звенигово олаште партий пашаште. Районысо Администрацийыште социал полыш пӧлкам, варажым социал рӱдерым вуйлатен. 1997-2007 ийлаште Провой кундемысе Администраций вуйлатышын алмаштышыже. Мер Каҥашын еҥже (2008-16). Марий Элын Чапкагазше дене палемдалтын (1999).

65 ий дене Татьяна Маковам.

Макова Татьяна Владимировна. Калуга кундем Сухиничский районысо Шлиппово селаште 1954 ий 16-шо июльышто шочын. Тунемме корныжо: Горькийысе сылнысем училище (1975), Озаҥысе консерваторий (1982). Паша корныжо марий опер да балет театр дене кылдалтын: оркестрын солисткыже, 1991 ий гыч концертмейстер да оркестр вуйлатыше. Марий Элын сулло (1997) да калык (2005) артисткыже.

65 ий дене Раисия Даниловам.

Данилова Раисия Михайловна. Юлсер районысо Чодраялеш 1954 ий 28-ше июльышто шочын. Тунемме корныжо: Йошкар-Оласе сылнысем училище (1975), Марий кугыжаныш педагогике институт (заочно, 1987). 1975 ий гыч – Маргосфилармонийыште, «Марий Эл» ансамбльысе хорын артисткыже. 1980-2014 ийлаште марий радион редакторжо. Тале журналист. Марий эстрадын шӱдыржӧ. Мер Каҥашын еҥже (1992-96). МССР-н сулло артисткыже (1992).

60 ий дене Ангелина Речкинам (Гуляевам).

Речкина (Гуляева) Ангелина Сионьевна. Курыкмарий районысо Тошто Тарашнур ялеш 1959 ий 3-шо июльышто шочын. Тунемме корныжо: Йошкар-Оласе сылнысем училище, Куйбышевский кугыжаныш тӱвыра институт. 1995 ий гыч Бауманский лицей пелен верланыше йоча сымыктыш школым вуйлата, «Узоры» мурышо да куштышо йоча ансамбльын руководительже. Марий Элысе тӱвыран сулло пашаеҥже (1998).

60 ий дене Светлана Веткинам.

Веткина Светлана Никодимовна. Морко районысо Усурт ялеш 1959 ий 7-ше июльышто шочын. Шиньша кыдалаш школым тунем пытарен (1976). Паша корныжо 1980 ий гыч Морко райпосо Нуж-Ключ кевытыште тӱҥалын. Ондак продавец, ик ий гыч – кевыт вуйлатыше. Марий Элын Чапкагазше дене палемдалтын (1994). Российысе торгайымашын сулло пашаеҥже (1998).

60 ий дене Татьяна Степановам.

Степанова Татьяна Николаевна. Морко районысо Изи Шӱргӧ ялеш 1959 ий 9-ше июльышто шочын. Тунемме корныжо: Марий культпросветучилище, Озаҥысе кугыжаныш тӱвыра институт. 1997 ий гыч Республикысе калыкле тӱвыра рӱдерын тӱҥ администраторжо. Марий Элысе тӱвыран сулло пашаеҥже (2000). 10-шо марий калык погынын делегатше (2016).

60 ий дене Игорь Кудрявцевым.

Кудрявцев Игорь Михайлович. Юлсер кундемысе Помары станцийыште 1959 ий 12-шо июльышто шочын. Марий политехнический институтым тунем пытарен (1981). Паша корныжо: ялозанлык министерствыште механизаций пӧлкан инженерже, «За коммунизм» колхозын, «Помары» КДП тӱҥ инженерже. 1994 ий гыч «Эр кече» фермер озанлыкым чумырен да вуйлатен. 2000-09 ийлаште «Акпарс» фирмын вуйлатышыже. 2011 ий гыч «Здоровый позвоночник» ИП-м вуйлата. 2018 ий гыч «Чоткар патыр» марий калыкын тӱвыражым да эртыкшым арален да вияҥден колтымо шотышто фондым чумырен да вуйлатен шога. «Предниниматель года» республикысе конкурсын сеҥышыже (2001). Марий Элысе Кугыжаныш Погынын депутатше (1996-2000). Мер Каҥашын еҥже (2000-04). Марий Элын Чапкагазше дене палемдалтын (1999).

60 ий дене Зинаида Веденькинам.

Веденькина Зинаида Алексеевна. У Торъял районысо Веденькино ялеш 1959 ий 16-шо июльышто шочын. Йошкар-Оласе 3-шо номеран ПТУ-м тунем пытарен (1976). Троллейбус предприятий пеленысе курсым пытарен (1979), троллейбус виктарыше пашам тӱҥалын. «За трудовое отличие» медаль дене палемдалтын (1986). СССР Кӱшыл Советын депутатше (1989-91).

60 ий дене Альберт Васильевым.

Васильев Альберт Николаевич. Юлсер кундемысе Курмузаково ялеш 1959 ий 24-ше июльышто шочын. 1999 ий гыч бизнесыште. «Онар» торгайымаш фирмым вуйлата. 10 марий калык погынын эскерышыже (2016).

60 ий дене Юрий Семёновым.

Семёнов Юрий Степанович. Шернур районысо Захарово ялеш 1959 ий 26-шо июльышто шочын. Тунемме корныжо: Йошкар-Оласе совхоз-техникум (1978), Марий кугыжаныш педагогике институт (1994). Паша корныжо Медведево районысо «Новый путь» колхозышто тӱҥалын. Варажым тиде районыштак «Победитель» колхозышто тыглай бригадир гыч тӱҥ инженер марте кушкын. 1986 ий гыч жилищно-коммунальный аланыште – мастер гыч начальник марте. 2003-08 ийлаште Марий книга савыктышын вуйлатышыже.

60 ий дене Надежда Спиридоновам.

Спиридонова Надежда Савватеевна. Пермь кундем Суксун районысо Тукманы ялеш 1959 ий 26-шо июльышто шочын. Сызганка кыдалаш школышто 42 ий туныкта. Суксун районысо Марий калыкле тӱвыра рӱдерын вуйлатышыже. 8-ше да 10-шо марий калык погынын делегатше (2008, 2016).

55 ий дене Вячеслав Еменгуловым.

Еменгулов Вячеслав Степанович. Куженер районысо Кугу Тумньымучаш ялеш 1964 ий 11-ше июльышто шочын. 1985 ий гыч Куженерысе ДЮШС-н Коҥганурысо филиалын тренерже. Кумдан палыме спорт мастер-влаклан тӱҥалтыш спорт шинчымашым пуэн. Нунын кокла гыч Б.Шубин, Е.Быков, Д.Шибанаев, А.Таныгина.

55 ий дене Никандр Горячкиным.

Горячкин Никандр Владимирович. Марий Турек районысо Изи Купта ялеш 1964 ий 22-шо июльышто шочын. Тунемме корныжо: Марий Турекысе 25-ше номер СПТУ (1982), Марий политехнический институт (1989). Паша корныжо шочмо районысо Администраций дене кылдалтын: ялозанлык управленийын начальникше (1992), Администраций вуйлатышын алмашыже (1997). 2003 ий гыч – «Марагропромтехснаб» фирмыште: тӱҥ вуйлатышын алмашыже, кум ий гыч – тӱҥ вуйлатыше. 2010 ий гыч – Марий аграрный колледжын вуйлатышыже. 2013-14 ийлаште Марий Турек районысо Администрацийын вуйлатышыже. 9-ше марий калык погынын делегатше (2012).

55 ий дене Владимир Ласточкиным.

Ласточкин Владимир Иванович. Йошкар-Олаште 1964 ий 23-шо июльышто шочын. Паша корныжо Марий машиностроительный заводышто тӱҥалын. «Игнатьевский» газовый кооперативыште водитель, варажым председатель лийын. «Марийскспецстрой»-ышто вуйлатышын алмашыже сомылым шуктен. 1995 ийын Марий кугыжаныш университетым тунем пытарен. 1999 ий гыч «Мӱкш» совхозын вуйлатышыже.

55 ий дене Наталья Плетенёвам.

Плетенёва Наталья Владимировна. Саратов кундем Озимский районысо Озимки посёлкышто 1964 ий 23-шо июльышто шочын. Котельнич оласе кооперативный техникумым тунем пытарен (1985). 2013 ий гыч «Кильмезь мари» калыкле тӱвыра автономийын вуйлатышыже. «Марий сем» фольклор ансамбльын вуйлатышыже. 10-шо марий калык погынын делегатше (2016).

55 ий дене Николай Палутовым.

Палутов Николай Николаевич. Курыкмарий районысо Сарлайкино ялеш 1964 ий 30-шо июльышто шочын. Украинысе марий-влак ушемын вуйлатышыже. 8-ше, 9-ше, 10-шо марий калык погынын делегатше (2008, 2012, 2016).

50 ий дене Виталий Курзенёвым.

Курзенёв Виталий Янаевич. Киров кундем Яраҥ районысо Ленет-Поле ялеш 1969 ий 21-ше июльышто шочын. Сарапул оласе технический училищым тунем пытарен (1989). Республикысе инвалид-влакын ушем пеленысе велосипед заводышто слесарь-сборщиклан ыштен. 1994-96 ийлаште самырык инвалид-влакын ушем вуйлатышын алмаштышыже. 1996 ий гыч спортышто. Инвалид-влак коклаште штангым нӧлтымаште Российын чемпионжо (1999, 2000). Россий чемпионатын ший призёржо (1995, 1996, 1998). Европын чемпионжо (1996). Тӱнямбалсе чемпион (2000). Тӱнямбалсе чемпионатын ший призёржо (1996, 1999).