90 ий дене Александр Сапиным.

Сапин Александр Иванович. Свердловск кундем Красноуфимск районысо Кугу Тавра ялеш 1929 ий 24-ше ноябрьыште шочын. Красноуфимскысе педучилищым тунем пытарен (1947). Шочмо мландыште туныктен. Марий краевед-влакын районысо секцийым чумырен (2005). Кум проза книган, шочмо кундемлан пӧлеклалтше гимнын авторжо. Марий Элысе тӱвыран сулло пашаеҥже (1992).

80 ий дене Тамара Григорьевам.

Григорьева Тамара Семёновна. Юлсер районысо Отымбал ялеш 1939 ий 4-ше ноябрьыште шочын. Кумдан чапланыше ече спортсменка. Тора 1965 ийын кум гана СССР-ын спорт мастер нормативым шуктен. Неле эҥгек деч вара, уэш спортыш пӧртылын. Ветеран ийготыш шуымеке, 16 гана тӱнямбал чемпионка лӱмым сулен. Ынде индеш ий почела республикыштына тудын лӱмеш ече таҥасымаш эртаралтеш.

80 ий дене Валерий Матвеевым.

Матвеев Валерий Петрович. У Торъял районысо Укташ ялеш 1939 ий 14-ше ноябрьыште шочын. Тунемме корныжо: Йошкар-Оласе педучилище (1957), Марий кугыжаныш пединститут (1969). Кӱшкӧ тӧрштымаште МАССР-ын чемпионжо (1964). Йошкар-Оласе спорткомитетын вуйлатышыже (1969-74). Минобразований пеленысе республикысе ДЮСШ-ын вуйлатышыже (1979-2003). Марий Элысе баскетбол федерацийын председательже (1975-2001). «Олимп» ассоциацийын президентше (1993-2001). МАССР капкыл культурын сулло пашаеҥже (1990).

70 ий дене Николай Антоновым.

Антонов Николай Иванович. Провой кундемысе Красногорский посёлкышто 1949 ий 19-ше ноябрьыште шочын. Коми мландыште ила. Чолга меръеҥ. Шке жапыштыже «Мари Эл» Коми регионысо икымше заполярный землячествым (1992-2003), «Финно-Угрия» Воркутасе общественный фондым (1999-2005) вуйлатен.

70 ий дене Маргарита Ушаковам.

Ушакова Маргарита Тимофеевна. Юлсер кундемысе Нагорино ялеш 1949 ий 21-ше ноябрьыште шочын. Тунемме корныжо: Свердловск кундем Серовысо ГПТУ (1967), Марий кугыжаныш университет (1985). Шочмо районышто почтышто ыштен, заводысо да районысо газет-влакын журналистше лийын, социал пашаеҥ сомылым шуктен. Руш да марий йылме дене почеламутым, йомакым, пьесым воза. 1993 ий гыч вич сборникше лектын. «Тошто пӧртын монологшо» повестьше ялысе илышым пеш чын почын пуышылан шотлалтеш (2000).

65 ий дене Алевтина Килюшикым.

Килюшик Алевтина Аркадьевна. Киров кундем Яраҥ районысо Симаничи ялеш 1954 ий 3-шо ноябрьыште шочын. Медведево районысо администраций вуйлатышын алмаштышыже лийын. Марий Мер Каҥашын еҥже (2004-08). 9-ше марий калык погынын эскерышыже (2012). «За заслуги перед Марий Эл» медаль дене палемдалтын (2010).

65 ий дене Николай Тимофеевым.

Тимофеев Николай Григорьевич. Параньга районысо Олор ялеш 1954 ий 3-шо ноябрьыште шочын. Тунемме корныжо: Йошкар-Оласе сӱрет училище (1974), Таллиннысе сӱрет институт (1978). Школышто туныктышылан тыршен, тӱвыра полатыште сӱретче-оформитель лийын, 1991 ий гыч — шке усталык пашажым гына шукта. Кӱртньым таптыше мастар семын палыме. 2005 ийын Марий Турекыште апшатгудым почын. Андрей Эшпайын «Иван Грозный» фильмжылан тӱрлӧ ӱзгарым ямдылен (2008). 1999 да 2000 ийлаште Марий Турекыште тудын ончерже-влак эртаралтыныт. «Марий ушемын» районысо пӧлкам вуйлатен. Марий Мер Каҥашын еҥже лийын (2004-12).

65 ий дене Андрей Дубниковым.

Дубников Андрей Михайлович. Шернур районысо Дубники ялеш 1954 ий 20-шо ноябрьыште шочын. Москосо художественно-промышленный училищым тунем пытарен (1985). Сӱретче. Пашаже-влак Российыште гына огыл, тыгак Австралий, США, Европышто аралалтыт. 1989 ий гыч Йошкар-Олаште, Москошто, Санкт-Петербургышто, Таллинныште да моло вере тудын ончерже-влак эртаралтыныт. Санкт-Петербургысо марий-влакын землячестве вуйлатышын алмашыже.

65 ий дене Леонид Киртаевым.

Киртаев Леонид Никонорович. Советский районысо Лайсолаште 1954 ий 20-шо ноябрьыште шочын. Тунемме корныжо: Марий кугыжаныш университет (1987), Марий кугыжаныш техник университет (2000). Кельмаксоласе администрацийым вуйлатен. Кызыт сулен налме канышыште. Чолга историк-краевед семын палыме. Фронтовик-земляк, тылыште тыршыше-влак нерген ятыр книган автор. Кельмаксоласе «Поиск» лӱман военно-патриотический группым вуйлата. 10-шо марий калык погынын делегатше лийын (2016).

60 ий дене Михаил Асессоровым.

Асессоров Михаил Алексеевич. Курыкмарий районысо Дубовая станциеш 1959 ий 2-шо ноябрьыште шочын. 1970 ийлаште ешыже Карелийыш илаш куснен. Петрозаводск оласе кугыжаныш университетым тунем пытарен (1984). Кызыт сулен налме канышыште. 2010 ий гыч «Марийцы Карелии» мер организацийым вуйлата. 9-ше да 10-шо марий калык погынын делегатше лийын (2012, 2016).

60 ий дене Геннадий Яндуловым.

Яндулов Геннадий Николаевич. Шернур районысо Феклисята ялеш 1959 ий 8-ше ноябрьыште шочын. Марий политехнический институтым тунем пытарымеке, Рязань кундемыште паша корныжо тӱҥалын. 1984 ий гыч – Шернурышто: Поланурысо РТП-н инженерже, цех вуйлатыше. 1988 ий гыч – ВЛКСМ районысо комитетын икымше секретарьже, 1990-96 ийлаште – уэш Поланурысо РТП-те: цех вуйлатыше, вуйлатыше-влак каҥашын председательже. 1996 ий гыч – районысо администраций вуйлатышын икымше алмаштышыже, ты годымак 2002-04 ийлаште Шернурын главаже. 2004-2019 ийлаште – Шернур районын вуйлатышыже, депутат-влак погынын председательже. «За заслуги перед Марий Эл» орденын медальже дене палемдалтын (2014). 9-ше да 10-шо марий калык погынлаште эскерыше лийын (2012, 2016).

60 ий дене Галина Армяковам (Конаковам).

Армякова (Конакова) Галина Ивановна. Шернур район Кукнурысо Анануреш 1959 ий 12-шо ноябрьыште шочын. 1983 ийын Марий кугыжаныш университетым тунем пытарен да паша корныжым Марий образований институт дене кылден. Редактор пашам кызытат шукта.

60 ий дене Тамара Патрушевам.

Патрушева Тамара Аркадьевна. Медведево районысо Малиновский лесоучасткыште 1959 ий 12-шо ноябрьыште шочын. Ятыр ий «Кугарня» газетын тӱҥ бухгалтержылан тырша. Марий Мер Каҥашын Тергыше  комиссийжым вуйлатен (2008, 2012-14).

60 ий дене Сергей Коротковым.

Коротков Сергей Дмитриевич. Курыкмарий районысо Петухово ялеш 1959 ий 22-шо ноябрьыште шочын. Йошкар-Оласе сылнысем училищым, Москваште заочный калык сымыктыш университетым тунем пытарен. Микряково тӱвыра пӧрт пеленысе «Аяр» ансамбльын вуйлатышыже (1991 ий гыч). Курыкмарий районышто ик мероприятият тудын фонограмме деч посна ок эрте. «Мыры» конкурсышто Гран-при дене палемдалтын (1994). Марий Элысе тӱвыран сулло пашаеҥже (1995).

60 ий дене Арсентий Актанаевым.

Актанаев Арсентий Анатольевич. Оршанке районысо Чирки ялеш 1959 ий 30-шо ноябрьыште шочын. Оршанкысе 11-ше номеран СПТУ-м тунем пытарен (1978). Паша корныжо «Марийскавтодорысо» кӱварым чоҥышо управлений дене кылдалтын: водитель, монтажник, бетонщик лийын. Пашажым кӱкшын аклен, Марий Элысе Чапкагаз дене палемденыт (2005). Российын сулло чоҥышыжо (2011).

55 ий дене Татьяна Ивановам.

Иванова Татьяна Ивановна. Марий Турек районысо Кӱшыл Седня ялеш 1964 ий 1-ше ноябрьыште шочын. Елембаево тӱвыра пӧртыште калык усталык методист сомылым шукта. «У вий» мурышо ансамбльым вуйлата. 10-шо марий калык погынын делегатше лийын (2016).

55 ий дене Елизавета Игнатьевам.

Игнатьева Елизавета Ивановна. Килемар районысо Йӱксарыште 1964 ий 3-шо ноябрьыште шочын. Марий кугыжаныш университетым тунем пытарен (1987). Паша корныжо Марий книга савыктышыште корректорлан тӱҥалын. 1996 ий гыч – Марий образований институтышто: ончыч учебник-влакым савыктыше методист, пел ий гыч редакционно-савыктыше пӧлка вуйлатыше. 2009 ий гыч – марий филологий да тӱвыра пӧлкам вуйлатен шога. 50 наре шанче статья да пособий-влакын авторжо. Филологий шанче кандидат (2004).

50 ий дене Алексей Голубцевым.

Голубцев Алексей Иванович. Шернур районысо Чибыж ялеш 1969 ий 12-шо ноябрьыште шочын. 1992 ий гыч Марий самырык театрыште. Кызыт театрын тӱҥ сӱретче сомылым шукта. «Марла ойлаш тунемына» мультфильм-влакын аниматоржо.