90 ий дене Николай Исанбаевым.

Исанбаев Николай Исанбаевич. Пошкырт кундем Калтаса районысо Ӱлыл Качмаш ялеш1929 ий 27 февральыште шочын. Тунемме корныжо: Краснокамск оласе педучилище (1948), Марий кугыжаныш педагогика институт (1952). СССР-се Шанче академий пеленысе языкознаний институтышто аспирантурым тунем пытарен (1955) да тыштак изирак шанче пашаеҥлан тыршаш тӱҥалын. Варажым Марий шанче да шымлыше институтышто (1958 ий гыч), Марий кугыжаныш пединститутышто (1963 ий гыч) пашам ыштен. 1996-2009 ийлаште – Марий кугыжаныш университетыште финн-угор йылме кафедрын профессоржо. Филологий наука доктор (1993). Марий Элысе шанчын сулло деятельже (1999).

85 ий дене Иван Ивановым.

Иванов Иван Семёнович.Совет районысо Куберсолаште 1934 ий 25 февральыште шочын. Йошкар-Оласе педучилищыште шинчымашым поген. Варажым Марий кугыжаныш педагогика институтым отличий дене пытара (1958) да аспирантурыш пура. Паша корныжат пединститут дене кылдалтын: тыглай ассистент гыч профессор марте кушкын. 2008 ий гыч – Марий кугыжаныш университетын профессоржо. Филологий наука кандидат (1970). Марий кугыжаныш педагогика институтын почётан профессоржо (2004). МАССР-се Верховный Совет Президиумын Чапкагаз дене палемдалтын (1980). МАССР-се шанчын сулло деятельже (1981). Российысе кӱшыл школын сулло пашаеҥже (2014).

80 ий дене Раиса Носыревам.

Носырева (Исаева) Раиса Кузьминична. Ульяновск областьысе Тошто Кулатка селаште 1939 ий 10 февральыште кресаньык ешеш шочын. Кыдалаш школым пытарымеке, 1958, агрономлан тунемнеже ыле, пурен кертын огыл, садлан Саратов кундемысе Вольск театрыш актрисылан пашам ышташ тӱҥалын. 1969 ий гыч – Йошкар-Олаште руш драме театрын актрисыже. МАССР-ын (1987) да Российын (2011) сулло артисткыже. Марий Элын калык артисткыже (1998).

80 ий дене Александр Новосёловым.

Новосёлов Александр Фёдорович. Марий Турекыште 1939 ий 18 февральыштте шочын. Тунемме корныжо: Озаҥ оласе сӱретче училище (1961), Ленинград оласе живопись, скульптура да архитектура институт (1967). РСФСР Художественный фонд пеленысе Марий мастаркудын пашаеҥже лийын. 1973-77 ийлаште сӱретче училищым вуйлатен. 1996 ий гыч шке усталык пашажым гына шукта. Кумдан палыме панно, витраж-влакын авторжо. Йошкар-Олаште тудын ончерже-влак эртаралтыныт (1979, 1999). Марий Элысе Кугыжаныш премий дене палемдалтын (2005). Марий Элын сулло сӱретчыже (2011).

70 ий дене Александр Усоловым.

Усолов Александр Николаевич. Параньга районысо Усолаште 1949 ий 18 февральыште шочын. Йошкар-Оласе сӱретче училищым тунем пытарен (1979). Йошкар-Оласе предприятийлаште сӱретчылан тыршен. РСФСР Художественный фонд пеленысе Марий мастаркудын пашаенже лийын. 2003 ий гыч шке усталык пашажым гына шукта. Тӱрлӧ жанран да тӱрлӧ шулышан паша-влакын автор. Марий Элысе пӱртӱсын да калыкын шкешотан улмым сӱртеше гоч мастарын почын пуа. Йошкар-Олаште тудын ончерже-влак эртаралтыныт (1999, 2005, 2010). Марий Элын сулло сӱртечыже (2004).

70 ий дене Иван Егоровым.

Егоров Иван Ильич. Юлсер кундемысе Пезмучаш ялеш 1949 ий 22 февральыште шочын. Тунемме корныжо: Йошкар-Оласе сылнысем училище (1969), Гнесинмыт лӱмеш сылнысем-педагогика институт (1974). 1972 ий гыч – Йошкар-Оласе сылнысем училищын туныктышыжо. 1975 ий гыч – Марий сылнысем театрыште (варажым опера да балет театр): дирижёр, сылнешке вуйлатыше, сылнешке вуйлатышын алмашыже. 2007 ий гыч – Марий филармонийыште: директор, сылнешке вуйлатыше. «Гончар в медвежьей шкуре» икымше марий мюзиклын дирижёр-постановщикше. Тӱрлӧ спектакль, радио да телепостановка-влаклан семым келыштарен. МАССР-се Верховный Совет Президиумын Чапкагаз дене палемдалтын (1981). МАССР-ын сулло артистше (1988). Российысе сымыктышын сулло деятельже (1998). Марий Элын Кугыжаныш премий дене (2005), «За заслуги перед Марий Эл» орденын медальже дене (2014) палемдалтын.

65 ий дене Нина Ефарицкаям.

Ефарицкая Нина Евгеньевна. Латвийысе Елгава олаште 1954 ий 13 февральыште шочын. Чебоксарысе сӱретче училищым (1973), Ленинградысе живопись, скульптура да архитектура институтым (1980) тунем пытарен. 1980 ий гыч Йошкар-Олаште тырша: сӱретче училищын туныктышыжо, Марий драмтеатрын сӱретче-постановщикше, Марий ТЮЗын тӱҥ сӱретчыже, книга издательствын пашаеҥже, эрыкан сӱретче. Ятыр спектакль деке декораций да костюм эскиз-влакым ямдылен. Москва, Баку, Чебоксары олаласе ончерлашке шке пашажым луктын. Йошкар-Олаште тудын ончерже эртаралтын (2004). Марий Элын Кугыжаныш премий дене палемдалтын (1999).

65 ий дене Татьяна Ушаковам.

Ушакова Татьяна Ивановна. Йошкар-Олаште 1954 ий 24 февральыште шочын. Лу ияш спортивный гимнастика деке шӱмаҥын.1969 да 1971 ийлаште – МАССР-ын абсолютный чемпионкыжо. СССР-се чемпионатын ший призёржо (1970). СССР-ын спорт мастерже (1971). 1975 ийын Марий кугыжаныш пединститутым тунем пытарымеке, СДЮШОР-ышто тренер пашам шукташ тӱҥалын. 1994-2015 ийлаште – кугурак тренер. 22 спорт мастерым ямдылен. Россий кӱкшытан судья лийын. Марий Элысе Чапкагаз дене палемдалтын (1999). Марий Элын сулло тренерже (2009). Марий Элысе капкультурын сулло пашаенже (2014).

60 ий дене Валерий Байбулатовым.

Байбулатов Валерий Тимиргалиевич. Пошкырт кундем Мишкан районысо Тигирменево ялеш 1959 ий 13 февральыште шочын. Пошкырт кундемысе ялозанлык институтым тунем пытарымеке, шочмо ялыште колхозын бригадирже лийын. 1982 ий гыч – ВЛКСМ районысо комитетын икымше секретарьже. 1984 ий гыч – ялозанлык организацийлаште вуйлатыше, агроном, председатель сомылым шуктен. 1992 ийын Уралысе социал да политик институтым пытарымеке, Мишканыште 150-ше профучилищым вуйлаташ тӱҥалеш. Тӱҥ пашам шуктымо деч посна, 2004-15 ийлаште республикысе марий историй да тӱвыра рӱдерым вуйлатен. Мишкан районысо депутат-влак каҥашын председательже (2012-14). Марий Мер Каҥашын еҥже (2008-16, кок созыв). Пошкырт кундемысе образованийын сулло пашаеҥже (2009). Пошкырт кундемысе ялозанлыкын сулло пашаеҥже (2013). Яныш Ялкайн лӱмеш премий дене палемдалтын (2014). 

55 ий дене Юрий Ильиным.

Ильин Юрий Васильевич. Морко районысо Красный Стекловар посёлкышто 1964 ий 13 февральыште шочын. 1987 ийын Горький оласе мединститутым тунем пытарен. Паша корныжо Ленинград кундемысе Лодейное поле олаште тӱҥалын: хирург, анестезиолог. 1992-96 да 1998-2015 ийлаште Йошкар-Оласе 5-ше поликлиникыште тӱҥ врачын алмаштышыже. Кумда профилян специалист. Марий Элын сулло врачше (2009).