85 ий дене Аркадий Смирновым.

Смирнов Аркадий Григорьевич. Морко районысо Шиньша селаште 1934 ий 1-ше сентябрьыште шочын. Тунемме корныжо: Москосо областной пединситут (1960), Ленинградысе пединститут пеленысе аспирантура (1973). Психологий шанче кандидат (1975). 1977 ий гыч Марий кугыжаныш университетыште: кугурак преподаватель гыч педагогике да психологий кафедра вуйлатыше марте кушкын (1983-2008), кок ий декан сомылым шуктен. 2010-12 ийлаште – общий психологий кафедрын профессоржо. Российысе кӱшыл школын сулло пашаеҥже (2005).

80 ий дене Иван Ивановым.

Иванов Иван Иванович. Морко районысо Алдышка ялеш 1939 ий 22-шо сентябрьыште шочын. Тунемме корныжо: Марий культпросветшкол (1959), Марий кугыжаныш пединститут (1975). Паша корныжо Марий телевидений дене кылдалтын: режиссёрын ассистентше гыч тематике передаче-влак редактор марте кушкын. МАССР тӱвыран сулло пашаеҥже (1990). 1999 ий гыч Польшышто ила.

70 ий дене Ираида Овечкинам.

Овечкина Ираида Дмитриевна. Пошкырт кундем Калтаса районысо Тошто Яш ялеш 1949 ий 1-ше сентябрьыште шочын. Тунемме корныжо: Пошкырт мландысе Благовещенский педучилище (1965), Марий кугыжаныш пединститут (1975). Паша корныжо Шернур районысо Кукнур школ дене кылдалтын (1975-2012): руш йылмым да сылнымутым туныктен, куд ий завуч сомылым шуктен. Ятыр тунемшыже республике кӱкшытан конкурс-влакын призёржо лийыныт. Тӱрлӧ тунемме-методический пособий-влакын авторжо. Марий Элысе образованийын сулло пашаеҥже (2000). Российын сулло туныктышыжо (2012).

70 ий дене Валентина Васильевам.

Васильева Валентина Михайловна. Морко районысо Мизинер ялеш 1949 ий 12-шо сентябрьыште шочын. Тунемме корныжо: Оршанке педучилище (1968), Марий кугыжаныш университет (1975). 1968 ий гыч шочмо районышто туныкташ тӱҥалын: ондак Кумужъял школышто, 1979 ий гыч – Коркатово школышто биологийым туныктен. Ятыр республике кӱкшытан, кок – Россий кӱкшытан биологий дене олимпиадын призёр-влакым ямдылен. Шуко выпускникше медвузлашке тунемаш пуреныт. ВДНХ-н той медаль дене палемдалтын (1985). МАССР школын сулло (1989), Марий Элын калык (2001), Российын сулло туныктышыжо (2007).

70 ий дене Алевтина Бердинскаям.

Бердинская Алевтина Ильинична. Шернур посёлкышто 1949 ий 18-ше сентябрьышто шочын. Ятыр ий Республикысе йоча книгапӧрт секретариатын вуйлатышыже лийын. Марий муро сем автор семынат палыме. Тудын мурыжо-влакым Татьяна Денисова, Эльвира Трифонова да молат йоҥгалтарат.

65 ий дене Надежда Казанцевам.

Казанцева Надежда Алексеевна. Марий Турек районысо Арып-Мурза ялеш 1954 ий 12-шо сентябрьыште шочын. Ленинградысе ужалыме-экономический институтым тунем пытарен. Коло ий наре Мурманскыште илен. Бухгалтер, экономист, ревизор пашам шуктен. 1995 ий гыч – Йошкар-Олаште. Туныкташ тӱҥалеш: ондак Марий кугыжаныш пединститутышто, варажым – Йошкар-Оласе ужалыме-экономический колледжыште. 2007 ий гыч «Саскавий» ӱдырамаш ушемын еҥже. 9-ше марий калык погынын эскерышыже (2012).

60 ий дене Алексей Конаковым.

Конаков Алексей Дмитриевич. Шернур район Кукнурысо Кондрач ялеш 1959 ий 2-шо сентябрьыште шочын. 1980 ийын, армий деч вара, милицийыш пашаш пурен. Ятыр ий участковыйлан тыршен. 1990 ийын Горькийысе кӱшыл милиций школым тунем пытарен. 1992 ий гыч – уголовный розыск управленийыште: оперуполномоченный гыч вуйлатышын алмаштышыже марте кушкын. Полковник (2003). Ятыр награде дене палемдалтын: «Лучший сотрудник криминальной полиции» знак дене (2003), «За отличие в охране общественного порядка» медаль дене (2003), «За доблесть в службе» медаль дене (2015). МВД-н почётан сотрудникше (2011).

60 ий дене Лидия Михайловам.

Михайлова Лидия Аркадьевна. Провой кундемысе Аркамбал ялеш 1959 ий 2-шо сентябрьыште шочын. Озаҥысе тӱвыра институтым тунем пытарен (1980). Ятыр ий библиотечный системыште тыршен. 1997 ий гыч Провой кундемысе администрацийын тӱвыра пӧлкаштыже: ондак специалист, 1999 ий гыч – вуйлатыше. Районысо мервуй (2016). Ныл марий погынын делегатше (2004, 2008, 2012, 2016). Марий Мер Каҥаш вуйверын еҥже.

60 ий дене Владимир Шамеевым.

Шамеев Владимир Васильевич. Татарстан Агрыз районысо Бима селаште 1959 ий 5-ше сентябрьыште шочын. Озаҥысе чоҥымо техникумым тунем пытарен (1986). Бима селасе Администрацийын вуйлатышыже (1988-95, 2005 ий гыч). 9-ше марий калык погынын эскерышыже (2012).

60 ий дене Андрей Ковальчукым.

Ковальчук Андрей Николаевич. Москошто 1959 ий 7-ше сентябрьыште шочын. Москосо кӱшыл художественно-промышленный училищым тунем пытарен (1981). Кумдан палыме скульптор. Тудын пашаже-влак Российын тӱрлӧ олалаште, йот эллаште вераҥдалтыныт. Эн кугу пашаже – Чернобыль трагедий жапыште вуйым пыштыше-влакым шарныме лӱмеш мемориал (Моско ола, 1993). 2007-14 ийлаште Йошкар-Олалан ятыр шарныктышым (И. Ноготков-Оболенский икымше сарзывуй, Герцог Моро, Леонид священномученик да молат), скульптур композицийым («Молодая семья», «Три музыканта», «Пушкин и Онегин» да молат) ямдылен. Российын калык сӱретчыже (2003). Российысе Кугыжаныш премий дене (2007), Почёт орден дене (2010) палемдалтын. Оболенский лӱмеш площадьыште вераҥдыме тарванылше фигуран шагатым ыштымылан Марий Элысе Кугыжаныш премий дене палемдалтын (2009).

60 ий дене Галина Якушевам.

Якушева Галина Фёдоровна. Провой кундемысе Кишнур ялеш 1959 ий 24-ше сентябрьыште шочын. Ача-аваже изинек муро дек шӱмаҥденыт, шкештат яндар йӱкан лийыныт. Садланак Йошкар-Оласе музыкальный школ-интернатым тунем лекмеке, музыкальный училищыш тунемаш пура (1975). Аваже илыш дене эр чеверласыш,ачаже чот черланыш. Кок ий тунеммеке, училищым кудалташ логале. Шольо-шӱжарым йол ӱмбак шогалташ манын, 1977 ийын «Электродвигатель» заводыш пашаш пура. Тыгодымак заочно технологический техникумышто шинчымашым пога. 1995 ий гыч – «Звениговский» совхозышто. Муро чоныштыжо эреак илен. Изигодсо шонымашыже – мурызо лияш – 2007 ийын шукталтын. Тунам Марий Эл Радиошто «Ой, каласе мылам» икымше мурыжо йоҥгалте. Тыге марий эстрадыште эше ик чолга шӱдыр чӱкталте. Таче кечын 30 утла мурыжо радиошто йоҥга.

55 ий дене Раисия Исанбаевам.

Исанбаева Раисия Ивановна. Пошкырт кундем Калтаса районысо Оръебаш ялеш 1964 ий 11-ше сентябрьыште шочын. Нефтекамск оласе филармонийыште ышта. «У сем» группын вуйлатышыже. «Чолман 2001» конкурсышто Гран-при дене палемдалтын. 10-шо марий калык погынын делегатше (2016).

55 ий дене Виктор Комаровым.

Комаров Виктор Иванович. Совет районысо Кельмаксола ялеш 1964 ий 22-шо сентябрьыште шочын. Пашам Москошто ышта. Самодеятельный композитор да мурызо семын палыме.

55 ий дене Леонард Коростиным.

Коростин Леонард Леонидович. Одо кундем Каракулинский районысо Ныргында ялеш 1964 ий 28-ше сентябрьыште шочын. Армийыште служитлымеке шочмо районысо «Дружба» колхозышто тыршен. 1994 ий гыч – бизнес пашам наҥгаен. 2008 ий гыч Ныргында ял шотан илемын вуйлатышыже.

50 ий дене Валентина Прозоровам.

Прозорова Валентина Аркадьевна. У Торъял районысо Нурсола лесничествыште 1969 ий 7-ше сентябрьыште шочын. Чебоксарысе кооперативный институтым тунем пытарен (2009). Бизнесъеҥ семын палыме. Совет районысо Кукмарий ялыште верланыше «Меркурий Плюс» фирмын генеральный директоржо. 2007 ийын Россий кӱкшытан «Женщина – директор года» лӱмым сулен. 9-ше да 10-шо марий калык погынын делегатше (2012, 2016).