90 ийым темыше чолгаеҥым:

Геннадий Иванович Кирилловым. Медведево районысо Кузнецово селаште 1929 ий 2 январьыште шочын. Отличий дене Марий кугыжаныш педагогика институтым (1950), варажым СССР-се шанче академийын Историй институтышто аспирантурым тунем пытарен. Паша корныжо Марий кугыжаныш педагогика институтыт дене кылдалтын. Старший преподаватель гыч декан марте кушкын. Историй наука кандидат (1954). «За трудовую доблесть» медаль дене (1961), «Знак Почёта» орден дене (1986), МАССР-се Верховный Совет Президиумын Чапкагаз дене (1978) палемдалтын.

85 ийым темыше чолгаеҥым:

Виктор Иванович Чемодановым. У Торъял районысо Кабашнур ялеш 1934 ий 26 январьыште шочын. Тунемме корныжо: У Торъялысе педучилище (1952), Марий кугыжаныш педагогике институт (1959), Озаҥысе кугыжаныш университетын аспирантурыжо (1968). МАССР-се школлаште, варажым Марий кугыжаныш педагогика институтышто туныктен. 1976 ий гыч — Марий кугыжаныш университетыште. Кафедрым вуйлатыше гыч икымше проректор марте шуын. Физика да математика шанче кандидат (1970). МАССР-се Верховный Совет Президиумын Чапкагаз дене палемдалтын (1984). Марий Элысе наукын сулло пашаеҥже (1994). Российысе кӱшыл школын сулло пашаеҥже (2011).

80 ийым темыше чолгаеҥым:

Борис Исидорович Тарелкиным. Краснодар кундем Брюховец районысо Бутаринская станицыште 1939 ий 6 январьыште шочын. 1971 ийын Краснодарысе художественный училищым тунем пытарен. РСФСР Художественный фонд пеленысе Марий мастаркудын пашаенже лийын. 1991 ий гыч шке усталык пашажым гына шукта. Военно-патриотический шӱлышан пашаже марий живопись фондым пойдареныт. Ятыр фронтовик, марий калыкын чолгаеҥ-влакын портретыштым возен. Йошкар-Олаште тудын ончерже-влак эртаралтыныт: 2000 ий – живопись, 2009 ий – сӱрет (рисунок). Марий Элын да Российын сулло сӱретчыже (1999, 2008).

80 ийым темыше чолгаеҥым:

Лариса Васильевна Матвеевам. Москошто 1939 ий 25 январьыште шочын. 1957 ий гыч — Йошкар-Олаште. Марий кугыжаныш педагогике институтышто шинчымашым поген (1962). Марий телевиденийын икымше дикторжо (1960-75). 1975-96 ийлаште — Центральный телевиденийын, Российысе телевидений да радиовещанийын редакторжо, тележурналистше. МАССР-ын сулло артисткыже (1970). «От счастья замирая» книган авторжо (2015).

75 ийым темыше чолгаеҥым:

Губейдулла Сибятуллович Юнусовым. Киров кундем Совет районысо Помыткино ялеш 1944 ий 27 январьыште шочын. Тунемме корныжо: Шернурысо кыдалаш школ (1959), Марий ялозанлык механизаций техникум (1964), Озаҥысе ялозанлык институт (заочно, 1972), Всесоюзный НИИ-н аспирантурыжо (1991). 1964 ий гыч Марий Элысе ялозанлык дене пашаже кылдалтын: Шернурысо РТП-н инженерже гыч министрын алмаштышыже марте. 1988 ий гыч Марий кугыжаныш университетыште тырша. Монографийын, тунемме пособий-влакын, 9 свидетельстве да патентын авторжо. Марий кугыжаныш университетын эн сай туныктышыжо (2007). Технике наука кандидат (1991). Технике наука доктор (2005). Марий Элысе ялозанлыкын сулло пашаеҥже (1994). Марий Элысе Кугыжаныш премий дене палемдалтын (2009). Российысе кӱшыл школын сулло пашаеҥже (2010).

70 ийым темыше чолгаеҥым:

Владимир Петрович Ушнурцевым. Москошто 1949 ий 27 январьыште шочын. Ачаже Марий Турек районышто шочын, армийысе офицер лийын. 11 ияш улмыж годым Йошкар-Олаш кусненыт. Тунемме корныжо: Марий кугыжаныш педагогике институт (1970), Горький оласе кӱшыл партийысе школ (заочно, 1984). Паша корныжо: Марий телевиденийын дикторжо (1969), Волжск оласе 4-ше №-ан школын туныктышыжо (1970), Марий политехнический институтын туныктышыжо (1970-78), ВЛКСМ-се областной комитетын отдел вуйлатышыже (1973-74), КПСС-се областной комитетын инструкторжо (1978 ий гыч), республикысе тӱвыра пашаеҥ-влакын профсоюз вуйлатышыже (1981 ий гыч). Марий Элысе да Российысе тӱвыран сулло пашаеҥже (2004, 2008). Марий Элын эн сай спортсменже (1973). Йошкар-Оласе волейболысо ветеран-влакын клубын президентше (2002-14).

65 ийым темыше чолгаеҥым:

Ананий Герасимович Ивановым. Курыкмарий районысо Важнангер ялыште 1954 ий 1 янвварьыште шочын. Чувашийысе кугыжаныш университетым (1976), Москосо кугыжаныш университетым (1982) тунем пытарен. 1983 ий гыч Марий кугыжаныш университетыште: кугурак преподаватель; отечественный историй кафедрын вуйлатышыже, шанче паша шотышто проректор. Историй наука доктор (1995). 1991 ий гыч – «Марийский археографический вестник» ежегодникын тӱҥ редакторжо. Российысе историк-архивист обществын марий отделенийын председательже (1997 ий гыч). Марий Элысе наукын сулло пашаеҥже (1997). Марий Элысе Кугыжаныш премий дене палемдалтын (2001). Российысе кӱшыл школын сулло пашаеҥже (2004). «За заслуги перед Марий Эл» орденын медальже дене палемдалтын (2013).

65 ийым темыше чолгаеҥым:

Наталья Ивановна Кульбаевам. У Торъял районысо Пектуаево ялеш 1954 ий 1 январьыште шочын. Марий кугыжаныш педагогика институтышто шинчымашым поген (1975). Паша корныжо: МарНИИЯЛИ-ште литература пӧлкан шанче пашаеҥже, ТЮЗ-што сылнымут пӧлкан вуйлатышыже, Марий тӱвыра да сымыктыш колледжын туныктышыжо. Филологий наука кандидат (1997). «Артисты Марийского театра» справочникын авторжо (2005).

65 ийым темыше чолгаеҥым:

Алексей Григорьевич Кудрявцевым. Киров кундем Кикнур районысо Ертӱр ялеш 1954 ий 5 январьыште шочын. Тунемме корныжо: Вологда оласе советско-партийный школ (1976), Киров оласе ялозанлык институт (заочно, 1989). Паша корныжо шочмо район дене кылдалтын: колхоз председательын алмаштышыже (1978-87), «Берёзовка» колхозын председательже (1988-92), 1992 ий гыч – районысо Калык детутат-влак ушемын председательже, 1993 ий гыч – районысо Администрацийыште орготделым вуйлатыше. «Кикнурский маслодельный заводын» директоржо (1998-2011). Мер Каҥашын еҥже (2008 ий гыч, кумшо созыв). Киров кундемысе марий-влакын ушем вуйлатыше (2009-15).

65 ийым темыше чолгаеҥым:

Сергей Николаевич Маковым. Куженер районысо Тумьюмучаш ялеш 1954 ий 8 январьыште шочын. Тунемме корныжо: Йошкар-Оласе 1-ше №-ан музыкально-художественный школ-интернат (1969), Йошкар-Оласе музыкальный училище (1972), Озаҥысе консерваторий (1977). Паша корныжо: Йошкар-Оласе музыкальный училищын, тыгак Республикысе тӱвыра да сымыктыш колледжын туныктышыжо, СССР-се Музыкальный фондын Марий пӧлкам вуйлатыше, 1995-2001 ийлаште Марий Элысе композитор-влакын ушемын председательже. «Муралтем мый йывыртен» икымше марий ораторийын авторжо (1980). «Кӱсото» икымше марий духовный кантатын авторжо (2008). «Чоныштем илет» икымше марий телесериаллан семым возен. Тыгак 45 театральный постановкылан да шӱдӧ утла кумдан палыме мурылан семым, район-влаклан гимным, йоча-влаклан инструментальный, вокальный, хоровой произведенийлам возен. Национальный тунемме тӧнеж-влаклан келыштарыме музыка предметым тунемме программым чумырен. Олык Ипай лӱмеш Марий комсомол премий дене, (1984). МАССР Верховный Совет Президиумын Чапкагазше дене (1986), Шостакович лӱмеш Российысе композитор-влакын ушемын премийже дене (1989), Марий Элысе Кугыжаныш премий (1995) дене палемдалтын. МССР сымыктышын сулло деятельже (1991).

65 ийым темыше чолгаеҥым:

Василий Александрович Пектеевым. Морко районысо Уилем ялеш 1954 ий 23 январьыште шочын. Ленинград оласе театр, музыка да кинематографий институтышто тунемын (1980). Паша корныжо Шкетан лӱмеш Марий кугыжаныш театрыште тӱҥалын: 1980 ий гыч – режиссёр, 1987 ий гыч – тӱҥ режиссёр, 1992 – 2002 ийлаште –сылнешке вуйлатыше. 50 утла тӱрлӧ жанран спектакльым шынден. Финн-угор калык-влакын тӱнямалысе театральный фестивальын организаторжо-влак коклаште (1992). Марий тӱвыра да сымыктыш колледжыште актёр-влакым ямдылыше кок группым луктын (1983, 1999). Санкт-Петербургысо кугыжаныш театральный искусство академийыште марий студийым вуйлатен (2001-05). «Омо» поэтический сборникын авторжо (2010). Российсе театральный обществын марий отделенийжым вуйлатыше (1982-84). Икымше Марий Оньыжа (1992-2000). Марий Элысе сымыктышын сулло пашаеҥже (1995). Марий Элысе Кугыжаныш премий дене палемдалтын (1997).

60 ийым темыше чолгаеҥым:

Валентина Михайдаровна Изиляновам. Пошкырт кундем Мишкан районысо Андреевка ялеш 1959 ий 1 январьыште шочын. Тунемме корныжо: Благовещенск оласе педучилище (1977), Марий кугыжаныш педагогике институт (1982), Кӱшыл литературысо курс-влак (1991). Марий книга савыктышын, «Пионер йӱк» журналын пашаеҥже. 1992-2005 ийлаште Национальный музейын шанче пашаеҥже. «Полан пеледме годым» (1983), «Турий, ит кодо пасуэм!» (1987), «Песнецвет» (1995), «Ныл йӱкан кумылсем» (1998) да моло книга-влакын авторжо. Олык Ипай лӱмеш Марий комсомол премий дене (1994), Марий Элысе Кугыжаныш премий дене палемдалтын (2007).

60 ийым темыше чолгаеҥым:

Юрий Николаевич Сидыгановым. Куженер районысо Пӱнчерйымал ялеш 1959 ий 19 январьыште шочын. Марий политехнический институтым (1984), Ленинградысе ялозанлык институтысо аспирантурым (1989) тунем пытарен. Паша корныжо: Марий политехнический институтышто чодыра да ялозанлык машина кафедрын доцентше (1990 ий гыч), Марий Элысе экономике министрын алмаштышыже (1995 ий гыч), МарГТУ-н механико-машиностроительный факультетын деканже (1997 ий гыч). 2014 ий гыч – Орлов кундемыште губернаторын советникше, 2016 ий гыч – ялозанлык департаментын начальникше. 2017 ий гыч уэш Марий Элыште: ялозанлык да продовольствий министр, Марий Элысе Виктер вуйлатышын алмаштышыже. Технике наукын докторжо (2004). ВВЦ-н шӧртньӧ медальже-влак дене палемдалтын (2002, 2003). Марий Элысе наукын сулло пашаенже (2007).