85 ий дене Анатолий Патрушевым.

Патрушев Анатолий Степанович. Шернур районысо Шӱкшер ялыште 1934 ий 12-шо апрельыште шочын.Тунемме корныжо: Шернурысо педучилище (1952), Марий кугыжаныш педагогика институт (1956), Горькийысе пединститут (1957), СССР шанче академийын Озаҥысе филиалысе аспирантура (1963). МарНИИ-те историй дене кылдалтше секторым вуйлатен. 1978 ий гыч Марий кугыжаныш университетыште: кафедра вуйлатыше, истфил факультетын деканын алмаштышыже, доцент. Историй шанче кандидат (1972). 1990 ийыште, вӱдшор тылзын, «Марий ушем» организацийын Икымше Погынышто тудым председательлан сайлыме, кок ий шот-радам дене вуйлатен. Марий Элысе шанчын сулло деятельже (1994).

85 ий дене Феония Грачёвам.

Грачёва Феония Тихоновна. Курыкмарий районысо Эсансолаште 1934 ий 18-ше апрельыште шочын. Марий кугыжаныш педагогика институтым тунем пытарен (1958), аспирантурышто шинчымашым келгемден (1972) да ты институтыштак пашам тӱҥалын. 1979 ий гыч Марий кугыжаныш университетыш куснен. Марий фразеологий мутерын автор-составительже (1974). Филологий шанче кандидат (1977).

85 ий дене Зоя Младшовам.

Младшова Зоя Васильевна. Курыкмарий районысо Кукшылиды ялыште 1934 ий 30-шо апрельыште шочын. Тунемме корныжо: Козьмодемьянск оласе ялозанлык техникум (1952), Чебоксарысе ялозанлык институт (заочно, 1970). Паша корныжо шочмо районысо «Дружба» колхоз дене кылдалтын: 1953 ий гыч – агроном, 1980-92 ийлаште – профком вуйлатыше. СССР Верховный Советын депутатше (1970-74). «Знак Почёта» орден дене палемдалтын (1971).

80 ий дене Валентин Матвеевым.

Матвеев Валентин Александрович. Киров кундем Санчурск районысо Залесные ялеш 1939 ий 1-ше апрельыште шочын. Поволжский лесотехнический институтым тунем пытарымеке (1961), Пермь кундемыш колтеныт. Керчевский сплавной рейдын тыглай мастер гыч партком секретарь марте кушкын. 1968 ий гыч МАССР-ште: Курыкмарий райком партийын инструкторжо, отдел вуйлатышыже, секретарьже. 1977 ий гыч Провой / Звенигово райком партийын икымше секретарьже. 1983-91 ийлаште Йошкар-Оласе горком партийын икымше секретарьже. Варажым механический заводым да торговый пӧртым вуйлатен. 1995-97 ийлаште Марий Элысе Виктер вуйлатышын икымше алмашыже лийын. МАССР Верховный Советын депутатше (1980-93, кум созыв). МАССР Верховный Советын Чапкагаз-влак дене палемдалтын (1975, 1989). Трудовое Красное Знамя (1976, 1981), «Знак Почёта» (1986) орденла дене палемдалтын.

80 ий дене Сергей Сайтиевым.

Сайтиев Сергей Шакиртович. Пошкырт кундемыште 1939 ий 13-шо апрельште шочын. «БашНИИСтрой»-ышто качество шотышто пӧлкам вуйлатен. Технике шанче кандидат. 9-ше марий калык погынын делегатше лийын (2012).

80 ий дене Роза Четкарёвам (Ложкина).

Четкарёва Роза Платоновна (Ложкина). Шернурышто 1939 ий 23-шо апрельыште шочын. Озаҥ оласе мединститутым (1964), тыштак ординатурым (1972) тунем пытарен. 1965-76 ийлаште Йошкар-Оласе горбольницын врачше, отделений вуйлатыше лийын. 1978 ий гыч Марий кугыжаныш педагогика институтышто: туныктышо, доцент, медподготовка кафедрын вуйлатышыже, 1996 ий гыч – профессор, 2004 ий гыч – медико-биологический дисциплине кафедрын доцентше. 60 утла шанче публикацийын авторжо. Калык медициным шымлен. Медицина шанче кандидат (1974). Марий Элысе шанчын сулло деятельже (1994).

70 ий дене Николай Ромашовым.

Ромашов Николай Александрович. Чебоксарыште 1949 ий 16-шо апрельыште шочын. Тунемме корныжо: Йошкар-Оласе сылнысем училище (1969), Марий кугыжаныш университет (заочно, 1977). Паша корныжо: Марий филармонийсе ВИА-н да оласе тӱвыра пӧртын сылнешке вуйлатыше, Марий кугыжаныш университетын мер профессий факультетын деканже, Йошкар-Оласе ГИК-ын тӱвыра пӧлкам вуйлатыше, 16-шо номеран ПТУ-н туныктышыжо. 1988 ий гыч Чайковский лӱмеш йоча сымыктыш школын вуйлатышыже. Марий Элысе да Российысе тӱвыран сулло пашаеҥже (1995, 2004). Марий Эл Республикысе Чапкагаз-влак дене (1999, 2004), «За заслуги перед Марий Эл» орденын медальже дене (2009) палемдалтын.

65 ий дене Виталий Михайловым.

Михайлов Виталий Тимраевич. Пошкырт кундем Балтач районысо Мишкино ялыште 1954 ий 28-ше апрельыште шочын. Марий кугыжаныш педагогика институтым тунем пытарен (1977). Паша корныжо Марий кугыжаныш университет дене кылдалтын. Финн-угроведений институтышто финн-угор сылнымут да фольклор кафедрын доцентше. Педагогике шанче кандидат (2005). 8-ше марий калык погынын делегатше (2008). 9-ше марий калык погынын унаже (2012).

60 ий дене Георгий Кудряшовым.

Кудряшов Георгий Михайлович. Курыкмарий районысо Усола ялеш 1959 ий 12-шо апрельыште шочын. Паша корныжо 1980 ийын Козьмодемьянск олаште тӱҥалын: «Копир» заводын автоматчикше, ПМК-те каменщик, райком партийын инструкторжо, журналист. 1993-98 ийлаште оласе газетын редакторжо. 2001 ий гыч районысо Администраций вуйлатышын алмашыже. 2004-14 ийлаште Курыкмарий муниципал районын вуйлатышыже, депутат-влак погынын председательже.

60 ий дене Сергей Богдановым.

Богданов Сергей Иванович. Шернур районысо Кугу Лужала ялеш 1959 ий 14-ше апрельыште шочын. Куйбышевысе мединститутым тунем пытарен (1986). Паша корныжо Республикысе стоматологий поликлиникыште тӱҥалын. 1987 ий гыч Шернурысо райбольницыште: врач-стоматолог, стоматологий отделенийым вуйлатыше, 1997 ий гыч – тӱҥ врач. Марий Элын сулло врачше (2009).

60 ий дене Елена Абдукаевам.

Абдукаева Елена Минлигареевна. Пошкырт кундем Бакалинский районысо Токбердино ялеш 1959 ий 25-ше апрельыште шочын. Пашаже Бакалинский сельсовет дене кылдалтын. 9-ше марий калык погынын делегатше (2012).

55 ий дене Владимир Актанаевым.

Актанаев Владимир Иванович. Йошкар-Олаште 1964 ий 18-ше апрельыште шочын. Тунемме корныжо: ГИТИС (1985), Йошкар-Оласе сылнысем училище (1994), Марий кугыжаныш университетысе юрфак (заочно, 2000). 1985 ий гыч Марий калыкле драме театрын актёржо, 2002 ий гыч – театр вуйлатыше. 2007-18 ийлаште Марий Элысе тӱвыра, печать да калык-влак дене паша шотышто министрын икымше алмаштышыже. «Марий национальный конгрессын» вуйлатышыже (2005-06). Российысе финн-угор калык театр-влакын ассоциацийын председательже (2010 ий гыч). Марий Элын сулло да калык артистше (1998, 2006). Кызыт Москваште ила.

55 ий дене Маргарита Меньшихым.

Меньших Маргарита Анатольевна. Свердлов кундем Арти районысо Афанасково ялеш 1964 ий 16-шо апрельыште шочын. Тюмень олаште ила. Бизнесъеҥ – «Меньших» ИП вуйлата. «Лӱҥгалтыш» ансамбльын солисткыже. 10-шо марий калык погынын делегатше (2016). 2017 гыч «Марийцы Тюмени» национал-тӱвыра автономийым вуйлата.

50 ий дене Людмила Кошаевам.

Кошаева Людмила Валерьяновна. Юлсер районысо Ярамарий ялеш 1969 ий 2-шо апрельыште шочын. Марий кугыжаныш педагогика институтым тунем пытарен (1991). 1991 ий гыч Волжск оласе лицейыште ИКН ден марий йылмым туныкта. 7-ше, 9-ше да 10-шо марий калык погынын делегатше (2004, 2012, 2016).

50 ий дене Нина Ивановам.

Иванова Нина Ивановна. Куженер районысо Шой Шӱдымарий ялеш 1969 ий 13-шо апрельыште шочын. Шӱдымарий ялилем администрацийын вуйлатышыже. 10-шо марий калык погынын делегатше (2016).

50 ий дене Сергей Барбосовым.

Барбосов Сергей Алексеевич. Курыкмарий районысо Ямангаш ялеш 1969 ий 14-ше апрельыште шочын. Ямангаш тӱвыра пӧртын режиссёр-постановщикше. 10-шо марий калык погынын делегатше (2016).

50 ий дене Эльвира Кочергинам.

Кочергина Эльвира Максимовна. Юлсер районысо Учейкино ялеш 1969 ий 29-ше апрельыште шочын. 1984 ий гыч Параньга районысо Олор ялыште. Марий кугыжаныш педагогика институтым тунем пытарен (1991). Олор кыдалаш школышто 1992 ий гыч туныкта. Воспитаний паша шотышто вуйлатышын алмаштышыже. 2006 ийын эн сай туныктышыжо. «Калык йӱла чоныштем ила» пособийын авторжо (2004). 7-ше да 9-ше марий калык погынын делегатше (2004, 2012).

50 ий дене Сергей Сметаниным.

Сергей Алексеевич Сметанин. Горький кундемыште 1969 ий 30-шо апрельыште шочын. Тунемме корныжо: Озаҥ оласе кугыжаныш университет (1991), Российысе Виктер пеленысе калык озанлык академий. Паша корныжо: ПФО-што Российысе Президентын полномочный представительжын аппаратыште юротдел вуйлатышын алмашыже, Совет Федераций пеленысе правовой да судебный йодыш-влак шотышто комитет вуйлатыше. 2007 ий гыч Россий Президентын Указше почеш 6 ийлан Индешымше арбитражный апелляционный судын председательын алмаштышыжлан шогалтеныт. 2013 ий гыч – Моско областьысе Арбитражный судын председательын алмаштышыже. 2017 ийын апрель тылзыште отставкыш каен. 2017 ий май тылзе гыч Марий Элысе Виктер вуйлатышын алмаштышыже сомылым шукта, тыгак Марий Элысе Главан администрацийжым вуйлата.