2015 ий 3 апрельыште Йошкар-Олаште «Марий юмыйӱлан тӱҥалтыш да ончыклык корныжо» семинар эртыш. Тушко Марий кундемнан тӱрлӧ районжо гыч 50 наре онаеҥ, тиде йодыш дене верлаште пашам виктарыше-влак чумыргышт.

Семинарыш толшо-влакым Марий Оньыжа, Марий Эл Кугыжаныш Погын вуйлатышын алмаштышыже Анатолий Иванов, Марий Элысе тӱвыра, печать да калык-влакын пашашт шотышто министерствын пӧлкажым вуйлатыше Игорь Садовин саламлышт. Сугынь мутым тӱҥ онаеҥ Александр Таныгин пелештыш да «Марий юмыйӱлан тӱҥалтыш да ончыклык корныжо» теме дене докладым ыштыш.

Марий калыкын эртыме корныж нерген марий историк, философ Александр Петров каласкалыш. Кугече пайрем нерген Кужэҥер районын онаеҥже Вячеслав Актуганов ойлыш.

Онаеҥ-влак Кугу кумалтыш радамым лончылышт.

Автор: Эльвира Куклина.