Марий талешке кечын марий калыкна шке кугезе тукымжым, эн чолга, лÿддымö патыр, эрык верч шогышо, тыныс илышыштат тудын ончыклыкшо верч тыршыше ÿдыр-эргыже-влакым порын шарналта. Тиде кече вашеш Морко район Купсола школышто пайрем эртыш.

Ты пайремым марий йылмым да литературым туныктышо М.Э. Михайлова ыштыш. Марина Эвриковна да школысо тунемше-влак Марий талешке кечын историйже дене палдарышт да концерт программе дене куандарышт. Купсола школын икшывышт ынде Кронуш,  Болтуш, Онар, Акпатыр да моло герой нерген сайын палат. Шке вер-шӧрысӧ талешкышт нергенат огыт мондо.

А кузе тыгай пайрем шочын? Тиде кече нерген икымше шонымаш 1917 ийыште Пошкырт кундем Бирск  (Пӱрӧ) олаште эртаралтше чумыр марий калыкын I погыныштыжо лектын. Лач тунам марий просветитель Павел Глезденёв илышын кажне саманысе талешкыже-влаклан пӧлеклалтше кечым палемдаш тӱҥалаш ойым пуэн. Но Марий талешке кечым пайремлаш 1990 ий гыч веле тӱҥалме.

Автор: Е.В. Григорьева, Шӱргыял школышто марий йылмым туныктышо.
Снимкыште: Купсола школышто «Талешке кечым» пайремлымаш.