«Марий талешке кече» пайремым эртарен колтымо шотышто
Р А Д А М Т Ы Ш

1. Иктежле радамтыш
«Марий талешке кече» пайрем (умбакыже Пайрем) Марий Мер Каҥаш Вуйверын темлымыже почеш эртаралтеш. Пайремын негызлышыже семын Мер Каҥашын да моло марий мер ушемын верысе актив ден муниципал кучем-влак лийын кертыт.

2. Цель ден задаче-влак

Тӱҥ шонымаш-влак:

— марий калыкын йылмыжым, ойыртемжым, тӱвыражым, йӱлажым шымлаш, аралаш да вияҥден шогаш;

— самырыктукымын калыкле шкешамым (самосознанийжым) шуараш;

— марийын калыкле ойыртемже семын тӱшка спортым вияҥдаш, таза илыш йӱлам шыҥдараш;

— калык-влакын келшымашыштым, тыныслыкым да конфессий-влак коклаште сӧрасымашым пеҥгыдемдаш.

Задаче-влак:

— марий талешке-влакым шукырак пален налаш да ончыкшо нунын дене кугешнен шогаш, кугырак-влакым шотлаш туныкташ;

— Пайрем кунам да кушеч лекме эртыкым пален налаш;

— самырык-влак коклаште марий йылмым палымын акшым кугемдаш;

— тӱрлӧ верыште илыше самырык марий-влак коклаште кылым пеҥгыдемдаш;

— самырык марий талешкым кычал муаш.

3. Пайрем кушто да кунам эртартаралтеш

Пайрем 2014 ий вӱдшорын 26 кечынже 10 шагатлан ялысе тӱвыра пӧртыштӧ эртаралтеш.

4. Пайрем эртарыме радам

1. Пайремым почмаш.

2. Пайрем кунам да кушеч лекме эртык, марий талешке-влак нерген палдарымаш да саламлымаш, коклаштыже мурымаш, куштымаш номер-влак.

3. «Марий талешке кече» пайремлан келыштарыме таҥасымаш (умбакыже Таҥасымаш).

4. Пайрем участник-влакын концертше.

5. Таҥасыше-влак шотышто да таҥасымашым эртарыме йӧн

Конкурсышто спортым йӧратыше, таза илыш йӱлам кучышо, мурен, куштен, почеламутым сылнын лудын моштышо 16-30 ияш марий рвезе-влак таҥасен кертыт.

Таҥасыше-влак пырля тыгай арверым кондышаш улыт:

  • марий вургемым,
  •  спорт формым,
  •  семӱзгарым (уло гын),
  • шкенышт нерген сведенийым, фонограммым да молым (электрон йӧн дене сайрак лиеш).

Йодмашым вӱдшор 10 кече марте___________________адрес дене

але ___________тел/факс дене але___________________ электрон адрес дене колташ.

Таҥасыше-влаклан 5 минуташ самопрезентацийым але саламлымаш визиткым (творческий представленийым) ямдылман. 

6. Таҥасымаш радам

1 тур. Таҥасыше-влакын самопрезентацийыштым ончымаш (кажныже кум минут марте).

Эн шукыжо 5 балл пуалтеш.

2 тур. Умылтараш — кӧ тыгай марий талешке (кажныже 1 минут чоло).

Эн шукыжо 3 балл пуалтеш.

3 тур. Экраныште:

Акпарс

Йыван Кырля

Чумбылат

Сергей Суворов

Ключников-Палантай

Болтуш

Акпатыр

Иван Петров

Тыгай шотан кандаш йодыш:

1) «Икымше марий профессионал композитор». Вашмут: Ключников-Палантай.

2). » МАО-ын икымше вуйлатышыже». Вашмут: Иван Петров

Кажне чын вашмутлан 1 балл пуалтеш.

4 тур. Экраныште:

С. Чавайн

М. Шкетан

А. Крупняков

К. Васин

В. Васильев

С. Николаев

Д. Орай

В. Колумб

Тыгай шотан кандаш йодыш:

«Акпатыр» драмын авторжо». Вашмут: С.Чавайн.

«Шанче, фольклорист, икымше марий «Марла календарь» альманахын авторжо». Вашмут: В.Васильев.

Кажне чын вашмутлан 1 балл пуалтеш.

5 тур Экраныште:

Шинчал

Муно

Ший окса

Кинде корика

Пыстыл

Булавке

Тыгай шотан куд йодыш:

Тудым «шинча вочмо» дечын кучылтыныт. Вашмут: булавке.

Тудым «Кушечын каенат – тушкак пӧртыл» манын, мӱндыр корныш кайыше марий еҥлан пуеныт улмаш. Вашмут: кинде корика.

Кажне чын вашмутлан 2 балл пуалтеш.

6 тур. Спорт ӱчашымаш

1). 60 метрыш куржмаш: 1 верлан – 5 очко, 2в. – 3 очко, 3в. – 2 очко, молыжлан – 1 очко дене.

2). Пикш дене лӱйымаш (кум йоҥеж). Цельыш логалше кажне йоҥежлан 2 очко пуалтеш.

3). Кугу кӱ моклакам нӧлтымаш: 1 верлан – 5 очко, 2в. – 3 очко, 3в. – 2 очко, молыжлан – 1 очко дене пуалтеш.

4). Кубок йӧнан патырлымаш: 1 верлан – 5 очко, 2в. – 3 очко, пелфиналыште сеҥышылан 2 очко пуалтеш, молыжо – очко деч посна.

Моло ӱчашымашымат ешараш лиеш.

7. Таҥасышын лектышыже

Сеҥышылан «Марий талешке» лӱм пуалтеш, тыгак Мер Каҥашын Чап тамгаже да шергакан пӧлек кучыкталтеш.

Моло таҥасыше тӱрлӧ номинацийыште сеҥышышке лектеш, нунылан Мер Каҥашын Таумут да пӧлек кучыкталтеш.

Иктешлыме годым 1 балл ден 1 очком тӧрлан шотлаш.

8. Окса йодыш

Таҥасымашым эртарыме паша да кочмо шотышто роскотым пашавиктезе-влак налыт, корно роскотым – колтышо-влак.