Мер Каҥашын чолга еҥже-влак Марий кундемысе школлашке лектын коштыт. Пытартыш жапыште Торъял район Кузнеч ден Марий Турек Сардаял школлаште лийыныт. Тыге 24 февральыште Сардаялыште «Марий Турек районысо школлаште марий йылме ден литературым туныктымо пашан кӱкшытшӧ» йыргешке ӱстел эртен.

Йыргешке ӱстелыште Марий Оньыжа Анатолий Иванов, Мер Каҥаш вуйвер исполкомым вуйлатыше Виктор Иванов, республикысе туныктыш да шанче министерствын тӱҥ специалистше Галина Малинина, Марий Турек район вуйлатыше Надежда Зангирова участвоватленыт.

Марий Турекыште марий йылме ден литературым туныктышо-влакын ушемыштым вуйлатыше, Мер Каҥашын еҥже Зинаида Батуева районышто марий йылмым туныктымо пашан лектышыж дене палдарен. Таче ты кундемыште 14 школ пашам ышта, тушто 436 туныктышо тырша да кок тӱжем утла йоча тунемеш. Кум школышто марий йылмым шочмо йылме семын тунемыт, моло школышто – кугыжаныш йылме семын. Ныл йочасадыште шочмо йылме дене мутланат. Кум школышто татар йылмым да Карлыган школышто одо йылмым тунемыт.

Марий Турекыште Марий калык конгрессын пӧлкажым вуйлатыше Лариса Ложкина «Марий йылме ден йӱлам арален да виянден кодымаште мер толкынын верже» темым тарватен.
Тыгак уна-влак 8 классын марий литератур урокыштыжо лийыныт. Занятийым «Дмитрий Орайын «Чолга шӱдыр» повестьше» теме дене кӱшыл категориян марий йылме ден литературым туныктышо Полина Сорокина вӱден.

5 классын марий йылме урокышкыжат пуреныт. Тудым кокымшо категориян марий йылме ден литературым туныктышо Зоя Мамаева наҥгаен, йоча-влакым «Литератур йылме да диалект-влак» теме дене палдарен.

Школын тоштержымат ончен савырненыт. Экскурсийым тоштер вуйлатыше Ольга Семёнова эртарен.