Марий Оньыжа, Марий Эл Республикысе Кугыжаныш Погыным вуйлатышын алмаштышыже Анатолий Иванов самырык корреспондент-влакым саламлыш. 2015 ий 2 июньышто «Марий юнкор — 2015» регион-влак кокласе слёт почылто. Марий Элын кажне районжо, Пошкырт ден Татарстан кундем гыч толшо 27 йоча пашам 1 июньыштак тӱҥале. Слёт 7 июнь йотке шуйна.

Марий Оньыжа Мер Каҥашын Таумутшым Морко район Эҥерсола школын туныктышыжлан Эльвира Васильевна Александрова ден Йошкар-Оласе 7-ше №-ан школын туныктышыжлан Ирина Вячеславовна Закиевалан пуыш.

А юнкор-влак арня жапыште  сылнымут дене келгынрак палыме лийыт, проблеман статьям возаш тунемыт. Печать пöртыш миен коштыт, газет вёрстко дене палыме лийыт, икымше марий газетын 100 ияш лӱмгечыж дене кылдалтше викториныште вийыштым тергат. Пӱртӱс денат кылым кучат – тидланже Ботанический садыш каят, Медведевысе зоопаркыште лийыт, «Арале пӱртӱсым» модышышто мастарлыкыштым тергат да молат. Нуным шуко оҥай еҥ дене вашлиймаш вуча. Яра жапымат пайдалын эртарат, мутлан, этнодискотекыште марла кушташ тӱҥалыт.