Республикысе школлаште марий йылмым туныктымо пашам ончымо шотышто Мер Каҥаш вуйверын 2014 ий январьысе пунчалжым шуктымо шот дене 2015 ий 20 майыште, ме, Марий Мер Каҥаш ден Кугыжаныш Погынын представительже-влак, Советский районысо Кодам тÿҥ общеобразовательный школыш миен коштынна.

Каласаш кÿлеш, тиде школым 1898 ийыштак негызлыме. А 1973 ийыште кыдалаш школым почмо. Кызыт тыште 83 йоча шинчымашым пога. Школым ынде кудымшо ий Татьяна Александровна Соколова вуйлата.

Кодам школ марий йылмым туныктымо шотышто районышто ик эн сайлан шотлалтеш. Марий Элын калык туныктышыжо, Марий Эл образованийын заслуженный пашаеҥже Зоя Александровна Беляеван тунемшыже-влак марий йылме да литература дене республиканский да межрегиональный олимпиадылаште чÿчкыдын сеҥышыш лектыт. Йоча-влак тыгак «Самырыктукым» республиканский конкурслаште, сочиненийым возымаште да драмкружок-влакын пашаштыже шкеныштым сай могырым гына ончыктат.

Ме марий йылмым туныктышо Зоя Александровна Беляеван урокыштыжо лийынна. Урокым да внеклассным мероприятий-влакым онченна. Тыгак кугурак класслаште тунемше-влак дене вашлийын, илышыште марий йылмын кÿлешлыкше нерген мутланенна.

Иктешлыме шот дене каласен кертам, Советский районысо Кодам тÿҥ общеобразовательный школышто марий йылмым туныктымо паша удан огыл каен шога.

Автор: Александр Петров.