2015 ий 1 апрельыште курыкмарий писатель Никон Игнатьевын шочмыжлан 120 ий теме. Тиде кечын Мер Каҥаш вуйвер исполкомын еҥже-влак (Виктор Иванов, Александр Петров, Эльвира Куклина) Марий Элысе туныктымаш да шанче министерствыште тӱшка да школ деч ончычсо туныктымаш пӧлкам вуйлатыше Ольга Майкова дене пырля Курыкмарий кундемыш миен коштна. Тӱҥ шонымашна: школышто марий йылмым кузе тунеммым ончалаш да ты шотышто иктешлымашым ышташ.

Йошкар-Ола гыч уна-влак Никон Игнатьев краеведений лӱмеш тоштерыш пурышна, мемнам кинде-шинчал дене вашлийыч. Пырляшке верысе вуйлатыше-влак ушнышт. Вара писательын бюстшо ончыко пеледышым пыштышна. Тушто «Салымсолан патыр эргыжы Н.В. Игнатьевлӓн – 120 и» видеопрезентацийым ончышна.

Тоштерыште район вуйлатыше, депутат собраний председатель Александр Гурьянов, администраций главан алмаштышыже Евгений Смелов, районысо тӱвыра пӧлкам вуйлатыше Людмила Атласкина, туныктымаш пӧлкан методистше Раисиа Алдушкина, Марий Эл Республикын икымше президентше Владислав Зотин, Марий Эл тӱвыран сулло пашаеҥже Зинаида Игнатьева да молат лийыч.

Тиддеч вара Пайскырык кундемысе «Изи мӱкш» йочасадышке (вуйлатыше Людмила Ефимова) кайышна. Тушто мыланна икшыве ден воспитатель-влак «Шудым солымаш» инсценировкым ончыктышт.

А Пайскырык школыш мийымеке, марий литератур урыкышто лийна. 7-ше классыште тунемше-влак Геннадий Матюковскийын «Сеҥымашын корныжо» романжым лончылышт. Урокым школышто 21 ий тыршыше Нина  Тюпакова моткоч тыматлын вӱдыш.

«Эх, тынь, шачмы йылмы…» внеклассный мероприятийым завуч Наталия Павлова эртарыш. Школ вуйлатыше Елена Оплева выступатлыш. Тӱрлӧ кӱкшытан конкурсышто сеҥыше ӱдыр-рвезе-влак мастарлыкыштым ончыктышт, кусле семат йонгалте. Туныктышо ансамбль муралтыш.

Таче Пайскырык школ шымлызе Лидия Васикован лӱмжым нумалеш. Тушто 210 икшыве тунемеш, 61 пашаеҥ тырша, тушеч 32 — туныктышо. Йоча-влак курыкмарий йылмым 1-11 класслаште тунемыт. Школыш 32 сола гыч коштыт, тӱҥ шотышто марий-влак улыт.

Ынде Мер Каҥаш республикын 11 районыштыжо лийын, школлаште марий йылмым тунеммым ончен. Умбакыжым моло район ден олашкат миен толшаш.

Автор: Эльвира Куклина.