2015 ий 14 апрельыште Мер Каҥаш вуйверын погынымашыже лие. Повесткыште таче кечылан ик эн тӱҥ йодыш —  «Марий форум: шошо сессийым» эртарен колтымаш.

Ме палена, ты гана Марий форум «Марий йылмым, тӱвырам да йӱлам аралыме пашаште тӱшкаувер йӧн-влакын надырышт» теме дене эрта. Вет тений марий йылме дене савыкталтше икымше газетын 100 ияш юбилейжым палемдена. Тыге докладым ышташ икымше оналмаш Валерий Мочаев ямдылалтеш, тыгак «Марий Эл» газетын тӱҥ редакторже Александр Абдулов да моло СМИ пашаеҥ шке шонымашыштым ойлышаш улыт.

Вуйвер погынымаште темлымаш лие: Форумышко Марий книга савыктыш ден Россий писатель ушемын марий пӧлкажланат ушнаш кӱлеш.

Тыгак форум годым «Марий йӱлам вӱдымӧ паша радам» теме дене Мер Каҥашын да марий чолга еҥ-влаклан туныктымо семинар лиеш. Вӱдышӧ-влак: Марий Эл Республикын тӱҥ картше Александр Таныгин ден икымше оналмаш Валерий Мочаев. Семинарыште «Молодёжь и духовное наследие народа мари» теме дене Никандр Попов, историй науко кандидат, В.Васильева лӱмеш МарНИИЯЛИ-н кугурак шанче пашаеҥже, выступатла.

Тиде кечын Денис Речкинын фотосӱрет ончерже пашам ышта. «Марий Эл ТВ» да моло презентаций лийыт.

Вара М.Шкетан лӱмеш Марий кугыжаныш драме театрыште «Вучо, мане, пӧртылам» спектакль вуча.

Автор: Эльвира Куклина.