2016 ий 22 ноябрьыште Мер Каҥаш вуйверын погынымашыже эртыш. Паша радамым Марий Оньыжа Эдуард Александров вÿдыш. Тышке марий мер организаций-влакын вуйлатышыштымат ÿжмö. Вет ончышаш йодыш-влак тачысе пагытлан пеш кÿлешан ыльыч. Нуным пырля чумырген ворандарен колтыман.

Тÿҥалтыште чыланат Марий Эл Республикысе тÿвыра, печать да калык-влакын пашашт шотышто министрын алмаштышыже Галина Ширяевам сылне лÿмгечыж дене шокшын саламлышт, илыш перкем тыланышт.

Вара марий калыкын I Погынжылан 100 ияш лÿмгечым кузе палемдыме нерген каҥашымаш лие. Ты шотышто Мер Каҥаш вес ийын 8 апрельыште Урал кундемыште шошо форумым эртара. А кеҥыжым Пÿрö олаште Погынын лÿмгечыжлан пöлеклалтше кугу пайрем лийшаш.

«Марий ушемым» вуйлатыше Владимир Козловат паша радамже дене палдарыш. Тыге марий Погынын шочмо кечыжлан книгам ямдылат, фестивальым эртарат. Киров кундемыште шымлызе Павел Глезденёвлан памятникым шогалташ кутырымо, вет тудлан 150 ий темеш. Шарнымаш оҥам икымше Погыным организоватлаш полшышо еҥ Ипат Васлийлан Морко район Кокласолаште сакаш палемдыме.

Тыге Тÿвыра министерстве, кажне организаций деч темлымашым поген, тиде пайрем дене кылдалтше планым ышта.

Мер Каҥашын шыже сессийже, кумшо пленумжо да марий форум лишемыт. Тений чыла тиде 9-10 декабрьыште эрта. Форум кышкарыште «Марий калыкын ончыкылыкшо: самырык-влакын ончалтышышт» конференций лиеш. Тыгак Мер Каҥашын еҥже-влак 9 декабрьыште Марий тиште кечым палемдымашке ушнат.

Погынымаш годым У Торъял районышто Мер Каҥашын пашаж нерген Евгений Небогатиков каласкалыш. Тудо палемдыш: «Районышто 14 500 еҥ наре ила. Тышечын 72 процентше – марий. Кандаш школ гыч 5 школышто марий йылмым шочмо йылме семын тунемыт. Районышто ик тÿвыра рÿдер, кажне поселенийыште клуб да лудмо вер-влак улыт. Тыгодымак ик йодыш тургыжландара: пытартыш жапыште яллаштат марий ача-ава икшывым рушла кутыраш туныктат. Ты шотышто кугу мутланымаш пашам виктарыман!».

Мучаште чолга марий еҥ Виктор Наумов Мер Каҥашлан компьютер мониторым пöлеклыш. Ушемын пашажым утларак вияҥдаш манын тыланыш. Кугу тау, Виктор Андреевич. Таза лийза.

Автор: Эльвира Куклина.