25 сентябрьыште Мер Каҥаш вуйверын погынымашыже эртыш. Эн ончычак Килемар районысо Мер Каҥаш активын пашаж нерген Надежда Алатайкина каласкалыш.

Таче Килемар районышто туризм паша икшырымын воранен толеш. Шуко еҥ Арда кундемыште верланыше «Раздолье» турист комплексым пала. Надежда Алатайкинан мутшо почеш, тудын пелен ончыкшым этнокультур рÿдерымат ышташ шонат. Теве «Околица» турбазым почаш ямдылалтыт.

Тений Килемар район 70 ияш лÿмгечыжым кумдан палемдыш.

Ты районысо еҥ-влакын Йошкар-Оласе курымарий землячестве дене кылышт пеҥгыде. Теве тиде ийынат кроссым пырля эртарен колтышт. А ик кечын ола гыч эмлызе, юрист да моло специалист лÿмын миеныт, верысе калыклан консультацийым пуэныт. Вашлиймаште Марий Элысе тÿвыра, печать да калык-влакын пашашт шотышто министр Михаил Васютин лийын, тудын дене калык посна мутланен, тургыжланыше йодышлан вашмутым налын кертын.

Тÿрыс вашлиймаш чапле концерт дене иктешлалтын.

Пытартыш жапыште Килемар кундемыште 55 йочасадым почыныт, 11 миллион теҥгем корнылан ойырымо.

Кызыт районысо школлашке 1222 йоча коштеш. Тушеч 929 еҥ марий йылмым кугыжаныш йылме семын, а 100 икшыве шочмо йылме семын тунемыт. Южо школышто 10-11 классыште марий йылме предмет йöршынат уке.

Школлаште марий йылмым туныктышо, тÿвыра пöртлаште хореограф да моло специалист огыт сите. Кумылан-влак лектыт гын, илаш верымат пуат!

Алатайкинан ойлымашкыже библиотеке пашаеҥ Елена Яковлева икмыняр ойым ешарыш. Тудын мутшо почеш, Арда библиотекыште 19 тÿжем книга гыч 60 книга гына марий йылме дене улыт. Тыгак кокымшо пел ийлан газет-влаклан подпискым ышташ шийвундо ыш ойыралт. Молан манаш гын, чыла газетлан подписке ак чот кӱзен каен, а бюджетыш тынар оксам пыштыме огыл.

Но Мер Каҥаш вуйверын еҥышт Килемар активист-влаклан кузе-гынат йӧным муаш да марий газет-влаклан библиотекыш подпискым ышташ темлышт.

Вуйвер погынымаш годым Марий Оньыжан оналмашыже Алёна Иванова Финн-угор калык-влакын конференцийышкышт миен коштмо нерген каласкалыш. Тудо 3-4 сентябрьыште Петрозаводскышто (Карелий) эртен.

Тыгак нылымше кварталллан Мер Каҥашын паша кышкаржым пеҥгыдемдышт да черетан Марий форум нерген мутланышт. Тыге Мер Каҥашын шыже сессийже ноябрьыште лийшаш. Кунам да могай теме дене эртаралтме нерген варарак шижтарена.

Илалше-влакын кечышт лишемеш. Мер Каҥашын еҥже-влак кугурак ийготан-влакым саламлаш ида мондо!

Автор: Эльвира Куклина.