2015 ий 23 мартыште Мер Каҥаш вуйверын черетан погынымашыже эртыш.

Марий Эл Республикысе тӱвыра, печать да калык-влакын пашашт шотышто министр Михаил Васютин Салехардыш Финн-угор калык-влакын ассоциацийыштын вуйвер погынымашке миен коштмыж нерген каласкалыш.

Медведево районысо Мер Каҥаш активын пашаж дене мер пашаеҥ, туныктышо Римма Чендемерова палдарыш. «Медведево районышто мероприятий-влакым эртарымашке кеч-могай калыкат уло кумылын ушна, тӱрлȫ калык ваш-ваш полшен ила. Айдеме шочмо мландыже, шочмо калыкше деч ойырлен, нунылан тупынь шогалеш гын, шкенжынат вий куатше, эрыкше да усталыкше пыта, маныт. Садлан, айдеме айдемак кодшо манын, меат, Медведево районышто илыше-влак, шочмо йылмынам, илыш-йӱланам арален кодашак тыршена. Кодшо ийын марий шӱлышан ятыр фестиваль, конкурс, концерт район кȫргыштȫ, тыгак республик кӱкшытыштат эртаралтыныт. Чыла тидым эртараш клуб, школ, библиотеке пашаеҥ-влак, администраций кугу надырым пыштат», — палемдыш чолга ӱдырамаш.

Тыгак Мер Каҥаш вуйверыште Марий талешке кечым эртарен колтымо нерген Республикысе марий тӱвыра рӱдерым вуйлатыше Валерий Григорьев ойлыш.

Мер Каҥашыш пурышо самырык-влакын пашашт шотышто шкешотан иктешлымашым икымше оналмаш Валерий Мочаев ыштыш. Вет южо самырыкъеҥже тачат мер пашашке ушнен огыл, а Мер Каҥашын еҥжылан шотлалтыт…

Вуйвер погынымаште кокымшо карталлан паша кышкарым пеҥгыдемдышт. Лишыл жапыште, 24 апрельыште, Марий форум вуча.

Автор: Эльвира Куклина.