2015 ий 4 августышто Мер Каҥаш вуйверын погынымашыже лие. Тушто кок тӱҥ йодышым каҥашышт.

Вуйвер погынымаш тÿҥалтыште шукерте огыл мемнам коден кайыше чолга марий еҥ, М.Шкетан лÿмеш марий кугыжаныш драме театрын вуйлатышыже Юрий Русановым шып шогалын шарналтышт.

Вара Россий кӱкшытан VII марий самырыктукым слётым эртарен колтымо нерген ойлышт. Марий Оньыжан алмаштышыже Алёна Иванова слётын пашажым иктешлыш. Мер Каҥаш вуйвер исполкомын еҥже Эльвира Куклина самырык этножурналист-влакын ямдылыме видеорепортажыштым ончыктыш да финанс йодыш шотышто ойлыш.

Палемдыман, 2015 ийыште Марий самырыктукым слёт 8-12 июльышто Провой кундем Чакмарий школ пелен эртен. Молгунамсе семын 100 утла огыл, а 67 еҥым марий калыкын илыме тÿрлö верже гыч чумырымо. Тыге, организатор-влакын иктешлымышт почеш, оргсомылым вияҥдаш куштылгырак лийын да качествылан кугурак тÿткышым ойыраш йöн лектын.

Школымат чын ойырымо манын иктешлышт. Вет чылт марий школым вуйлатыше Владимир Кашковат слётым эртарымашке кугу надырым пыштен. Звенигово район вуйлатыше-влакланат таум каласышт.

Вуйверыште пунчальыч: 2016 ийлан Марий самырыктукым слётым Оршанке районышто эртараш келыштараш да тудын темыж нерген шоналташ.

Кокымшо йодыш — «Эҥер вÿд ÿмбалне» фестиваль нерген. Тиде пайрем талантан изак-шолякАрсий ден Евгений Волковмытлан пöлеклалтын. У шонымашым илышыш шыҥдарыше кокла гыч ик эн тÿҥ еҥ – Мер Каҥашын еҥже, кидмастар Виталий Кудрявцев.

Тиде фестиваль 19 июльышто Оршанке район Тошто Крешын ялыште икымше гана да сайын эртен. Ты районын тÿвыра пöлкаж дене пырля ялысе калык сылне пайремым ыштен. Ынде тудым кок ийлан ик гана эртараш палемденыт.

Мер Каҥашын еҥже-влак чолга улыт, шуко сай шонымашым илышыш шыҥдарен шогат, почешышт калыкымат наҥгаен моштат.

Автор: Эльвира Куклина.