Сӱрем тылзын 4-ше гыч 10-шо кечыж марте Килемар район Церкысола /  Арда селаште Марий самырык тукымын IХ слётшо эрта.

Ты гана тудо «Шочмо кундем – кугезе мланде» темылан пӧлеклалтеш.  Слётын девизше: «Пушеҥгын вийже — вожышто, калыкын — у тукымышто».

Тушто самырык-влаклан этнотуризмым вияҥдыме, амалкалче (бизнес) паша, мер пашам шуктымо шотышто туныктат, этнокультур шотышто проект-влакым возымым умылтарат. Тыгак тӱрлӧ кундем гыч толшо ӱдыр-рвезе-влак мастар-класслаште шке мастарлыкыштым шуарат, кидмастар-влакын мастерскойышкыжо логалыт, спорт таҥасымашке ушнат, экскурсий дене коштыт, тӱвыра да каныме мероприятийлаште чолгалыкыштым ончыктат.

Слёт 4 июльышто 18 шагатлан почылтеш. А 8 июльышто слётыш толшо-влак Арда эҥер сер воктене луымшо гана эртаралтше «Кугезе мланде» фольклор ден этнографий пайремышке ушнат.

Самырык тукымын слётын ик организаторжо — Мер Каҥаш. Тендам Мер Каҥаш лӱм дене Марий самырык тукымын IХ слётышкыжо уло кумылын ӱжам. Кондыза саламлыме шомакым да каласыза тудым самырык тукымлан, кондыза поро кумылым – лийза мемнан дене пырля.

 

Марий Оньыжа                                                                        Александров Э.В.