Марий калыкын I погынжын 100 ияш юбилейжым ямдылыме да эртарыме шотышто паша кышкарым 2016 ий 27 декабрьыште Марий Мер Каҥаш вуйвер погынымаште ончышт.

У идалыкыште «Урал марий: историй да кызытсе илыш» марий форумым, Мер Каҥашын шошо сессийжым Свердловск кундемыште эртараш палемдыме. Ончычсо семынак Талешке кечылан пöлеклалтше «Талешкым шарналтен…» декаде, «Изи мöр пеледыш» пайрем, Марий самырыктукымын Россий кÿкшытан IX слётшо да моло пашат вучат.

Тыгак погынымаште йоча-влаклан пöлеклалтше Марий ёлкым кузу эртарен колтымо нерген ойлышт. Республик кÿкшытан пайрем 22 декабрьыште Курчак театрыште лийын. Тудым Марий тÿвыра рÿдер эртарен. Марий Элын 10 районжо гыч 9-12 ияш 120 утла йоча чумырген. Ты гана ёлкылан шийвундым спонсор-влак пуэныт. Мутлан, РФ Кугыжаныш Думын депутатше Светлана Солнцева, Мер Каҥаш, Йошкар-Оласе администраций, «Саскавий» марий ÿдырамаш ушем полыш кидым шуялтеныт.

Тургыжландарыше йодыш: пытартыш жапыште районласе марий школлаште марий ёлкым эртарымым чарненыт, театр-шамыч марий спектакльым темлат гынат, школ вуйлатыше-влак «рушла шындыме йомакым кондыза» манын каласат. Молан тыге?.. Тиде кушко шукта?..

Автор: Эльвира Куклина.