Вӱдшор (апрель) тылзын 11-ше кечынже Мер Каҥаш вуйверын погынымашыже лийын. Паша радамыште тӱҥ йодыш Марий форум дене кылдалтын. Тудыжо тиде тылзын 24-25 кечылаште Йошкар-Олаште эртаралтшаш. Российын 9 регионжо гыч марий-влакым ӱжмӧ, тыгак Марий Элын чыла марий районжо гыч толшаш улыт.

Икымше пел-кечыште форумыш погынышо-влак вес мероприйятыш – «Тошто марий йӱлан тачысе верже» шанче-практик конференцийыш (Марий Элысе Калык творчество рӱдер ямдыла) толшо-влак дене ушнат да пырля тӱвыра аланыште ыштыме паша нерген доклад-влакым колышташ тӱҥалыт. Тыгайже лу наре погына, докладчик-влак коклаште Н.С. Попов, О.А. Калинина, Э.В. Куклина (Йошкар-Ола), И.Н. Иликбаев (Екатеринбург), Н.П. Макарова (Озаҥ), В.Д. Кибатов (Татарстан), В.А. Абукаева (Башкортостан) да молат. Вес пел-кечыште кутырымаш калык пайрем да палемдыме кече-влакын кышкарже нерген (Тӱҥ онаеҥ А.И. Таныгин), Национально-культурный автономий-влакым чоҥымо нерген (А.И. Радыгин, О.А. Третьяков, Р.Я. Факаева) лиеш, варажым семинар-влак эртаралтыт: самырык-шамычлан тренинг, кугурак-влакым «Пеледыш пайрем але Семык?» каҥашымаш-ӱчашымаш вуча.

Кокымшо кечыште Мер Каҥашын 3-шо пленумжо погына. Йодыш-влакым пленумын еҥышт ойыраш да пеҥгыдемдаш тӱҥалыт, вуйвер гын шке деч теве мом темла: 1) 9-ше Марий калык Погын деч вара ик идалыкыште ышталтше мер паша нерген увер (Оньыжа А.Н. Иванов); 2) марий калыкын 2013 ийысе кугу юбилейже-влакым эртарымаште Мер Каҥашын верже; 3) Марий Элысе Шернур районын марий активын паша лектышыж нерген (Е.А. Лебедева); 4) Марий толкыным виктарыше-вуйлатыше кагаз-влак нерген.

24-ше кастене Марий форумыш толшо-влаклан организатор-влак Шкетан лӱмеш театрыш каяш темлат. Тыште марий мастар-влак руш классикым модын ончыктат – «Йӧным муышо йӧрым кочкеш» (А. Островский).

Вуйверыште моло йодышымат каҥашыме. Теве – Марий талешке кечым кушто да кузе эртарат?! Йошкар-Оласе марий–влак Шарнымаш сортам эр-эрдене лӱмлӧ марий-шамычлан шогалтыме чапкӱ да сакыме оҥа-влак воктене чӱктат. Тиддеч ончыч нуно чапкӱм але оҥам ятрайшаш (сайемдышаш) улыт: мушкаш, шӱкым погышаш… Вара веле сортам чӱктат.

Тыгай ошкыл пеш шотан да пайдале лийшаш. Мер Каҥаш вуйвер моло верлаштат тыгак ышташ ӱжеш.

Вуйвер погынымаш волгыдо шонымаш да поро шӱлыш дене эртен. Тудым Оньыжа А.Н. Иванов вӱден.

Шкенан Йыван.