Марий самырык тукым слётын кумшо кечынже жап пеш писын эртен кайыш.

Тунеммаш семинар «Бизнес шонымашым илышыш шыҥдарымаш» лӱмдалтын. Йошкар-Ола гыч толшо бизнес-тренер, коучер Татьяна Лебедева слётчик-влаклан пайдале лекцийым эртарыш. Тудо кузе бизнес-идейым шочыкташ, илышыш шыҥдараш йӧн-влакым кычалаш, йодыш-влаклан вашмутым муаш туныктыш.

Тыгак Татьяна пеш оҥай шонымашым каласыш: «Тендан ончыкылык пашада келша гын, тыршен тунемза, тыгак кычалза келшыше хоббим, тудо лектышым пуа, оксам конда». Семинар лекций дене гына мучашлалтын огыл, тыгак бизнес квест лийын. Тушто ӱдыр-рвезе-влак шкеныштын мастарлыкыштым, вийыштым, иктеш пашам ыштен моштымыштым тӱрлӧ заданийыште тергеныт. Участник-влакын тӱрлӧ бизнес-идей шочын. Мутлан, нарынче тӱсан команде Удмуртийысе Карагӧл район Ныргындыш ял воктене памашым моторешташ шонымашым ойленыт. Тудын воктене турист-влаклан страус фермым почаш лиеш манме шонымашат оҥай лийын. А кидеш ош кидшолым пижыктыше команде Килемар район Арде села воктен «Кугезе мланде» пайремым эртарыме верым могайым ужмыштым каласкаленыт. Нунат шкешамышт дене турист ден уна-влаклан йӧнан верым ямдылен моштеныт.

Кумшо кечын каныме программат шкешотат лийын: слётчик-влаклан автобус дене экскурсий эртаралтын. Нуно Килемар район мучко кудал эртеныт, Юл эҥер сер деке миен толыныт, Алёшкино ялыште верланыше «Раздолье» турбазым онченыт.

А кастене чылаштым Кино кас вучен. Арде профессионал техникумын икымше пачашысе залыштыже ӱдыр-рвезе-влак шонаш таратыше кӱчык кино-влакым онченыт. Шукыштын шинчаончалтышышт вашталтын, южо йодыш  шонаш таратен.

Кас вашлиймашыш Арде ял шотан администрацийым вуйлатыше Алатайкина Надежда Ивановна ден Йӱксар ялсовет вуйлатыше Богданов Олег Семёнович толыныт ыле. Участник-влак нунын  кушкын толмо корнышт дене палыме лийыныт, икмыняр темлымашымат налыныт. Мутлан, Олег Семёнович лӱддымӧ лияш кӱштен, а Надежда Ивановна кутырен моштымо чыла вере полша манын палемден. Уна-влакын ик шонымашыштым самырык тукымлан ушышкыжо пыштыман: сай лектышыш да сеҥымашыш шуаш окса огыл, а шинчымаш полша.

Вероника Мустаева, Анна Васильева.