12 апрельыште Удмурт Республикысе Грах районышто республик кӱкшытан марий тӱвыра фестиваль эртен. Марий Оньыжа Анатолий Иванов Марий кундем гыч мийыше делегаций дене шке саламмутшым колтен. Тыге Удмурт Республикысе Грах район администрацийым вуйлатыше Виктор Беловлан тушто марий йылмым, марий калык тӱвырам, кугезе-влакын йӱлаштым аралымаште да вияҥдымаште, калыкын кӧргӧ чон поянлыкшым ешарымаште да уш-акылжым шуарымаште чот тыршымылан Марий Эл Кугыжаныш Погын Таумутшым Республикысе марий тӱвыра рӱдерым вуйлатыше, Мер Каҥаш вуйвер исполкомын еҥже Валерий Григорьев кучыктен.

А Марий Эл гыч делегацийыш эше эстраде мурызо Роза Искакова (каласен кодыман, Роза ты районыштак шочын-кушкын), шке возымо мурыжым мурышо (бард) Геннадий Григорьев да журналист Светлана Пехметова пуреныт.

Фестиваль кышкарыште «Одо марий ушемын», Удмуртийысе самырык марий-влакын «Ӱжара» ушемыштын, тысе марий ўдырамаш-влакын «Ава шӱм» ушемыштын иктеш чумырымо пленумышт пашам ыштен. Кажне организацийын еҥже-влак ыштыме паша нерген ойленыт, ончыкыжым шуктышаш сомыл нерген радамленыт. Пленумын пашажым Удмуртийысе марий-влакын ушемыштым вуйлатыше Анатолий Радыгин вӱден.

Пленум сай лектыш дене пашам ыштен. Тушко толшо-влакым варажым чылаштымат республик кӱкшытан марий тӱвыра пайрем куандарен. Погынышо-влакын кумылыштым шке усталыкышт дене Грах районысо посна мастар да коллектив-влак вӱчкеныт. Тыгак толшо уна-влакат – Роза Искакова ден Геннадий Григорьев – икмыняр сылне мурым пӧлекленыт.