Уло кумылын чыландамат Кугу Сеҥымашлан 70 ий темме кече дене саламлем.

Пӱтынь Россий мучко, тыгак Марий Элыштат, кажне тукымышто да ешыште тиде пайремым ик эн кугулан шотлат. Вет фашизм ваштареш кучедалаш Марий кундем гыч 130 тӱжем утла еҥ каен. Нунын кокла гыч 56 тӱжемже сöй пасушто тыныс илыш верч шке вуйжым пыштен. Таче ме кажне ветеранлан тулан сöй пасушто, колхоз пашаште, фабрик ден заводлаште мемнан элнам, пӱтынь тӱням шучко фашизм деч арален кодымашке надырым пыштымыштлан мланде марте вуйнам савена.

Тÿнямбалне фашизм угыч ынже шарле манын, самырык тукымлан Кугу Отечественный сар нерген исторический чынлыкым ме эреак ушештарен шогышаш улына. Вӱран сöй пасушто шке вуйыштым пыштыше фронтовик-влак нерген волгыдо да чын шарнымаш кушкын толшо тукымын ушыштыжо эрелан кодшаш.

Пагалыме марий калык, ветеран-фронтовик ден тылыште Кугу Сеҥымашым лишемдаш полшышо пашаче калык!

Ончыкыжымат тыныслык верч тавадаҥ шогаш, шкенан элнам, марий кундемнам, шкенам пагалаш, шочмо йылмынам аклаш, марий тӱвыранам йöраташ, кугезе йӱланам жаплаш, самырык тукымым марий шӱлышеш шуараш ӱжам.

Чылаландат тынысле яндар кавам, пеҥгыде тазалыкым, кужу ӱмырым, вашла пагалымашым да пиалым тыланем.

Пайрем дене!

Марий Оньыжа Анатолий Николаевич Иванов.