Шочмо кундем ял, ола, посна район гыч тӱҥалеш. 85 ий ончыч Параньга район шочын. Таче Те, тыште шочын-кушшо, илыше калык, районын волгыдо шочмо кечыжым палемдеда. Кугу пайрем дене Марий Оньыжа семын Мер Каҥаш да чыла марий калык лӱм дене шокшын-шокшын саламлем.

Параньга район Марий Эл Республикын илышыштыже кугу верым налын шога. Шочмо кундемнам тӱзатымашке, вияҥдымашке изи огыл надырым пышта. Тӱшка пашаште пӱтынь район тырша, тыште кажне еҥын надырже раш коеш.

Каласыман, районышто тӱрлӧ калык (марий, татар, руш да молат) келшен илат. Кушкын толшо тукым йочасадлаште, школлаште шочмо йылмыжым тунемеш. Тиде куандара. Ӱшаныме шуэш, тыгай суапле паша эшеат вияҥеш, шочмо йылмылан умбакыжат кугу тӱткыш ойыралташ тӱҥалеш. Вет шочмо йылмыжым палыше, тукымвожшым аклыше еҥ кумда илыш корнышто огеш йом, эре ончылно лиеш. Тыге республикынат утларак виян лиеш.

Шергакан таҥ-влак, Параньга район ончыкшымат тӱзланыже, у деч у сеҥымаш, шуко сай лектыш лийышт. Тыште илыше кажне еҥлан тазалыкым, пиалым, ласкалыкым тыланем. Тек Тыланда районышто да республикыштат илаш куанле лиеш. Тек шочмо мланде Тендам арала.

Пайрем дене!

Пагален, Марий Оньыжа Э.В. Александров.