25 мартыште Марий Оньыжа Анатолий Иванов Республикысе «Пеледше тукым» йоча усталык конкурсын участникше-влакым саламлен. Тудо икшыве-влаклан тыгаяк чолга, чулым лияш да у деч у кӱкшытыш шуаш тыланен.

Конкурсыш кундемнан 29 йочасадше гыч 156 икшыве чумырген. Чылаже жюри кум номинацийыште 32 номерым ончен. А тиддеч ончыч (4-19 мартыште) Конкурсын икымше этапше чыла район ден олаште лийын: 117 йочасад гыч ик тӱжем наре (946 утла) икшыве 196 номерым ончыктен.

Тыге «Шкетын мурымаш» номинацийыште икымше верым Курыкмарий районысо Кулаково селасе «Кече» йочасад гыч Юлия Космакова сеҥен налын.

«Ансамбль дене мурымаш» номинацийыште икымше верым Курыкмарий район Пайгусово селасе «Изи мӱкш» йочасад ден Шернур район Шӱдымарий гыч йочасад пайленыт.
«Куштымаш» номинацийыште Провой кундем Краснояр селасе да Морко посёлкысо 7-ше №-ан йочасад-влак сеҥеныт.

«Пеледше тукым» конкурс латкокымшо гана эртаралте. Пытартыш жапыште ты проектым Республикысе марий тӱвыра рӱдер Марий Элысе кок (тӱвыра, печать да калык-влак паша шотышто ден туныктыш да шанче) министерстве полшымо дене илышыш шыҥдара. Тений конкурс «Тӱрлемӱдыр» номинацийым ешарыме дене ойыртемалте. Тушко йочан шке кидше дене але кугурак-влакын да ача-аван полшымышт дене тӱрлымӧ 74 тӱрлӧ паша пурен. Нуным конкурс годым посна ончер семын келыштарыме.

«Тӱрлемӱдыр» номинацийыште Йошкар-Оласе 29-ше №-ан «Ший оҥгыр» йочасад сеҥен.

«Пеледше тукым» конкурсын эше ик ойыртемже, кӱкшытшӧ — кажне участник мотор деч мотор, икте-весылан келшыдыме марий вургемым чиен. Чынже денак, ӱдыр-рвезе-влак пеледыш гай сылне ыльыч.

Икымше-кумшо верым сеҥен налше-влакым грамот да шергакан пӧлек-влак дене палемдыме, чылаштымат сертификат, таумут да тӱрлӧ пӧлек («Кече-Солнышко» журнал, «Ямде лий» газет, шере пӧлек) вучен.

Автор: Эльвира Куклина, этножурналист, блоггер.