20 сентябрьыште Пермь олан Сымыктыш да культур академийыштыже марий концерт гÿжлен. Верысе калыкым Марий Эл Республик гыч толшо «Морко кундем» ансамбль, «Цармис» куштышо театр, мурызо-шамыч Роза Искакова, Виктор Апталиков, Марина Садова, шÿвыр дене Иван Каменщиков, кÿсле дене Елена Тихонова куандареныт.
Сылне касыште Йошкар-Ола гыч амалкалче, тÿрлызö Ираида Степанова, Марий Элысе марий тӱвыра рӱдерын пашаеҥже, журналист, блоггер Эльвира Куклина, Калык усталык да культурканыш паша шотышто республикысе шанче-методик рӱдерым вуйлатышын алмаштышыже Иван Алексеев, марий тÿрым машина дене тÿрлышö мастар Александр Степанов лийыныт.
Концерт деч ончыч да вара амалкалче Степановмыт еш марий тувыр-влакым, тӱрлӧ сувенирым, книгам налаш темленыт.
А вашлиймашке студент ден шымлызе-влак, школышто тыршыше, тӱрлӧ мер организацийын еҥышт, мутлан, грузин, ненец, венгр обществым вуйлатыше да молат ушненыт.
Кас моткоч сылнын эртен, кажнын чонжым тарватен. Артист-влакым ончышо-шамыч моткоч порын вашлийыныт да пырля марла куштеныт, марий кумылыштым ончыктеныт.
Мероприятийым верысе мер организаций – Пермь олан марий рÿдерже (вуйлатыше – Раиса Попова) эртарен.
Автор: Эльвира Куклина.
Обсуждение закрыто.