Ӱдыр-рвезе-влак тÿрлö регионла гыч толыныт: Татарстан, Одо, Свердловск, Пермь, Киров, Пошкырт, Ханты-Манси кундем да Марий Элын чыла гаяк районжо. Эн кугу делегаций Пошкырт кундем гыч толын: 15 еҥ.

  

Слётым почмаште кажне кундем шке мастарлыкшым ончыктен: кö мурен, кö куштен, ала-кö почеламутым лудын. Саламлаш ятыр уна погынен: «Российысе марий-влак» федерал калыкле—тӱвыра автономийын председательже Лариса Яковлева, Марий Эл Республикын тÿҥ федеральный инспекторжо Пётр Журавлёв, Туныктыш да шанче министрын алмаштышыже Энзе Идиатуллина, Тÿвыра, печать да калык-влакын пашашт шотышто министерствыште пȍлка вуйлатыше Игорь Садовин, Российысе калык фронт толкынын Марий Элысе исполкомжын вуйлатышыже Надежда Ефремова, Килемар район администраций вуйлатышыже Людмила Толмачева да молат. А Оршанке район гыч толшо уна-влак эстафетым Килемар кундемлан кучыктеныт.

Мо оҥайже: ондак участник-влак слётын кресаважым — Лариса Яковлевам — паленыт гын, ты гана кресачажат рашемын. Тиде — Пётр Журавлёв. Тунам, индеш ий ончыч, Пётр Николаевич Марий Эл Республикысе туныктыш да шанче министерствыште самырык-влак дене пашам ыштыме шотышто пӧлкам вуйлатен.

         

Икымше кече — вашлиймаш кече. Палыме да палыдыме еҥым ужын кутырымашат куаным конденыт. Слётыш толшо-влак дене пырля игечат келесырланен огыл: кече шыргыжын да Арде профессионал техникум гыч тӱвыра пӧртыш флагым кӱш нӧлтен ошкылашат йӧным пуэн. Тугеже, ончыко. Салам, кокымшо кече!

Аку.