2015 ий 23-26 сентябрьыште Пермьыште эртыше “Национальный единстве” форумыш элнан 70 регионжо гыч 800 наре еҥ — республикысе кучемын еҥже, тӱвыра учреждений-влакын вуйлатышышт ден пашаеҥышт, мер толкынын лидерже, учёный ден журналист-влак ушненыт. Марий Эл Республик гычат индеш еҥан делегаций миен. Ты делегацийым Мер Каҥаш вуйверын еҥже, Марий Элысе виктерым вуйлатышын алмаштышыже, тӱвыра, печать да калык-влакын пашашт шотышто министр Михаил Васютин вуйлатен.

Форум кышкарыште икымыняр конкурс эртен. Тыге коммерческий огыл организаций ден мер толкын-влакын лидерышт-влаклан конкурсышто Марий Эл гыч мийыше-влак палынак ойыртемалтыныт. Теве “Мер толкынын лидерже” номинацийыште кокымшо верыш Мер Каҥаш председательын алмаштышыже, “Марий Эл” ГТРК-н журналистше Алёна Иванова лектын.

А “Мер толкынын вуйлатышыже” номинацийыште Мер Каҥаш вуйвер исполкомын еҥже, “Интеллектуал” тӱвыра-увер рӱдерын директоржо Эльвира Куклина икымше вер дене палемдалтын.

Федеральный округ-влакын конкурсыштышт Юл кундем федерал округ кокымшо вер дене палемдалтын. Тиде командыште Мер Каҥашын еҥже, Марий тӱвыра рӱдерын директоржо Наталья Пушкина лийын.