23 апрельыште Марий Оньыжа Анатолий Иванов ден «Саскавий» марий ӱдырамаш ушем вуйлатыше Ираида Степанова туныктымо да медицине пашалан шкенжым пӧлеклыше кумдан палыме марий ӱдырамаш Роза Платоновна Четкарёвам 75 ияш лӱмгечыж дене саламлышт.

Анатолий Николаевич Роза Платоновналан Марий Элысе Кугыжаныш Погынын Чап Кагазшым да книга пӧлекым кучыктыш. Ӱдрамашын марий медициныш кугу надырым пыштымыжым палемдыш да тудлан пеҥгыде тазалыкым, кужу-кужу ӱмырым тыланыш.

А Ириада Александровна «Саскавий» лӱм дене Роза Четкарёвалан пиалым, умбакыжат тыгаяк чулым лияш йодо да кышкывий дене сӧрастарыме шӱшерым, «Саскавий» возыман чай коркам пӧлеклыш.

Шернур-Кужэҥер вел ӱдыр кумда илыш корным тошка. Тудлан Российысе Естествознаний Академий кӱшыл шинчымашым пуымаште у шӱлышым ончыктымыжлан шӧртньӧ медальымат кучыктен.

А молан Шернур-Кужэҥер ӱдыр? Роза Четкарёва Шернурышто шочын, но азаж годымак Кужэҥер район Кугу Нольдурыш конденыт, да тыштак кушкын. Жапше годым Йошкар-Оласе медучилищым, Озаҥысе мединститутым пытарен, ятыр ий тӱрлӧ эмлыме верыште ыштен. 1978 ий гыч туныктымо пашашке пижын, варарак наукыш толын.

Илыш корныж дене тыште палыме лийын кертыда: http://mari-arslan.ru/ru/node/712.